E-byst ffug: Dathlu'r Nadolig yn parhau

Siôn Corn a'i gyd-weithwyr yn y digwyddiad y llynedd Image copyright Other
Image caption Dywed y grŵp eu bod wedi rhoi gwybod i Heddlu Gogledd Cymru

Mae grŵp ym Mangor wedi ail-drefnu digwyddiad Nadolig yng nghanol y ddinas wedi i nifer o alwadau ffug ganslo atyniadau.

Honnodd Grŵp Cymunedol Pobl Bangor nad oedd ganddyn nhw syniad pwy oedd wedi anfon y galwadau a'r e-byst ffug.

Bydd eu "Diwrnod Dathlu" ar Ragfyr 10 yn cynnwys atyniadau fel ogof Siôn Corn, ffair, adloniant byw a llawr sglefrio.

Dywedodd y grŵp eu bod wedi rhoi gwybod i Heddlu Gogledd Cymru.

'Tanseilio'

"Mae rhywun wedi ceisio tanseilio'r digwyddiad a honni mod i wedi canslo'r atyniadau," meddai'r cadeirydd, Nigel Pickavance.

"Pan ymatebodd rhai yn holi am fanylion y canslo fe gawson nhw e-byst sarhaus oddi wrth rywun.

"Yn ogystal cafodd un o'r atyniadau alwad ffôn oddi wrth 'fy mrawd'."

Dywedodd Mr Pickavance fod y grŵp wedi darganfod bod rhywun yn gwneud galwadau ffug pan gyfarfu un o'u gwirfoddolwyr â pherchennog un o'r atyniadau ym Mangor.

'Ymddiheuro'

"Mi wnes i ymddiheuro i berchnogion yr holl atyniadau ond dywedon nhw eu bod wedi cael eu bwcio ar gyfer digwyddiadau eraill.

"Ond am fod gennym ni berthynas wych cyn i hyn ddigwydd llwyddon nhw i sicrhau bod yr atyniadau ar gael.

"Rwan dwi'n defnyddio cyfrinair cyn siarad â threfnwyr yr atyniadau."

Dywedodd fod y grŵp yn edrych ymlaen at y digwyddiad ddydd Sadwrn.

"Rydyn ni am gynnal digwyddiad hudol i blant Bangor oherwydd nid yw pobl yn gallu fforddio teithio'n bell y Nadolig hwn," meddai.

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.