FIFA: Cymru wedi codi i safle 48

Gareth Bale Image copyright (C) British Broadcasting Corporation
Image caption Gareth Bale sgoriodd unig gôl y gêm yn erbyn Bwlgaria

Casglodd Cymru fwy o bwyntiau na'r un wlad arall ymysg timau pêl-droed y byd yn rhestr detholion FIFA yn 2011.

Yn ystod y flwyddyn cododd Cymru 68 safle i rif 48 o dan reolaeth Gary Speed, fu farw ym mis Tachwedd.

Mae hyn yn golygu bod Cymru wedi dringo mwy na'r un wlad arall yn ystod y flwyddyn.

Yn y rhestr fisol a gafodd ei chyhoeddi ddydd Mercher mae tîm Cymru un safle y tu ôl i'r Alban.

Yn ôl system FIFA casglodd Cymru 330 o bwyntiau eleni yn dilyn perfformiadau da yn ystod ail hanner y flwyddyn gan gynnwys buddugoliaethau yn erbyn y Swistir, Montenegro, Bwlgaria a Norwy.

Mae Gogledd Iwerddon wedi codi un safle i rif 88, mae Lloegr yn dal yn y pumed safle ond Sbaen sy'n dal ar frig y rhestr.

O ran y timau y bydd Cymru yn herio yn gemau rhagbrofol Cwpan y Byd y flwyddyn nesaf mae Croatia yn yr wythfed safle, Gwlad Belg (41), Serbia (27), yr Alban (47), a FYR Macedonia (103).

Rhestr detholion FIFA - Rhagfyr 2011

Safle Pwyntiau Newid
1. Sbaen 1564 0
2. Iseldiroedd 1365 0
3. Yr Almaen 1345 0
4. Uruquay 1309 0
5. Lloegr 1173 0
6. Brasil 1143 0
-----------------------------------------------------------------------------------------
22. Gweriniaeth Iwerddon 864 -1
47. Yr Alban 599 +2
48. CYMRU 591 +2
88. Gogledd Iwerddon 403 +1

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.