Ymosodiad honedig mewn arholiad ym Mhrifysgol Abertawe

Mae myfyrwraig sy'n astudio ym Mhrifysgol Abertawe wedi ei harestio ar ôl digwyddiad yn ystod arholiad.

Cafodd dyn 67 oed anafiadau i'w ddwylo yn ystod y digwyddiad.

Y gred yw bod y drosedd honedig wedi digwydd yn neuadd chwaraeon ar gampws y brifysgol brynhawn dydd Mawrth.

Cadarnhaodd Heddlu De Cymru fod menyw wedi ei harestio a'i rhyddhau ar fechnïaeth.

Y gred yw bod y dyn gafodd ei anafu yn aelod o staff y brifysgol.

Dywedodd llefarydd ar ran Heddlu De Cymru: "Mae menyw 24 oed wedi ei harestio ar amheuaeth o ymosod wedi digwyddiad yn neuadd chwaraeon Prifysgol Abertawe tua 3pm ddydd Mawrth.

"Dioddefodd dyn 67 oed anafiadau i'w ddwylo yn ystod y digwyddiad.

"Mae'r fenyw wedi'i rhyddhau ar fechnïaeth wrth i'n hymchwiliad barhau."

Dywedodd llefarydd ar ran Prifysgol Abertawe: "Mae'r digwyddiad honedig yn cael ei ymchwilio gan yr heddlu felly ni fyddai'n addas i'r brifysgol gynnig unrhyw sylwadau."

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.