Peacocks: 'Trafodaethau'n parhau'

Pencadlys Peacocks yng Nghaerdydd Image copyright BBC news grab
Image caption Mae'r cwmni yn cyflogi 400 staff yng Nghaerdydd

Mae cwmni siopau dillad Peacocks wedi gwrthod gwneud sylw am sibrydion eu bod yn wynebu mynd i ddwylo'r gweinyddwyr.

Mae'r cwmni o Gaerdydd - sydd â 550 o siopau ac sy'n cyflogi tua 400 yn eu pencadlys - wedi bod yn trafod eu dyledion gyda chyfranddalwyr.

Mae ymgynghorwyr annibynnol KPMG eisoes yn adolygu llyfrau'r cwmni.

Tra'n gwrthod gwneud sylw am adroddiadau mewn papur newydd, dywedodd lelfarydd ar ran y cwmni bod trafodaethau'n parhau.

Mae'r cwmni wedi lleoli ei bencadlys yng Nghaerdydd ers 72 o flynyddoedd er iddo gael ei ffurfio gan Albert Peacock yn Sir Gaer yn 1884.

Cynnydd

Cyhoeddodd y cwmni - sy'n rhedeg 750 o siopau o dan deitlau Peacocks a Bon Marche - eu bod wedi gweld cynnydd o 17% mewn gwerthiant dros gyfnod y Nadolig.

Mae adroddiad ym mhapur y Sunday Telegraph yn dweud mai asgwrn y gynnen yw os yw'r banciau - sy'n cael eu harwain gan Barlcays ac RBS - yn fodlon derbyn colled ar fenthyciadau a wnaed i'r cwmni.

Mae'r BBC ar ddeall bod y cwmni yn masnachu ac yn gwneud elw ar hyn o bryd, ac mai mater o RBS yn tynnu nôl o'r trafodaethau yw'r broblem.

Ond dywedodd llefarydd ar ran Barclays: "Mae Barclays wedi bod yn fodlon cefnogi'r rheolwyr wrth geisio ail-strwythuro'r busnes ar bob cam o'r daith."

Gofynnwyd i RBS am sylw ar y mater.

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.