Heddlu'n apelio wedi marwolaeth dynes wedi damwain car

Mae Heddlu'r Gogledd yn apelio am wybodaeth, ar ôl i fenyw farw mewn damwain car ym Mrymbo nos Lun.

Bu farw'r fenyw 21 oed wedi i ddau gerbyd daro'n erbyn ei gilydd ar ffordd y B5101, Vicarage Road, tua 7:20pm.

Rhyddhawyd dau o bobl o'u ceir gan aelodau o Wasanaeth Tân ac Achub Gogledd Cymru ond bu farw'r fenyw oedd yn teithio mewn car Peugeot yn y fan a'r lle.

Aed â gyrrwr y car i Ysbyty Maelor Wrecsam ag anafiadau difrifol ond nid angheuol.

Mae'r teulu wedi cael eu hysbysu o'r farwolaeth.

Mae'r crwner hefyd wedi ei hysbysu.

Chafodd gyrrwr y car Laguna ddim ei anafu.

Mae Heddlu Gogledd Cymru yn gofyn i unrhyw un a welodd y digwyddiad i gysylltu â nhw ar 101.

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.