Gweithwyr Pot Noodle yn streicio

Pot Noodle Image copyright PA
Image caption Mae ffatri Pot Noodle Crymlyn yn cynhyrchu 155 miliwn o'r byrbrydau bob blwyddyn

Mae gweithwyr ffatri Pot Noodle yng Nghrymlyn, Sir Gaerffili, yn streicio oherwydd newidiadau i'w pensiynau.

Roedd aelodau undeb Unite yn gweithredu'n ddiwydiannol ddydd Iau fel rhan o weithredu am 11 diwrnod ar safleoedd cwmni Unilever yn y pedair gwlad.

Mae'r aelodau yn credu y bydd y cynllun newydd yn arwain at bobl yn colli hyd at 40% o'u pensiynau.

Mynnodd Unilever y byddai'r cynllun yn "gystadleuol iawn" o hyd.

Dywedodd y cwmni eu bod wedi cael amser i baratoi am y gweithredu ond mae'r undebau wedi dweud y byddai'n effeithio ar gynhyrchu brandiau fel Pot Noodle, Persil, PG Tips a Lynx.

'Yn gandryll'

Dywedodd swyddogion undeb fod gweithwyr yn "gandryll" am y cynlluniau i gael gwared â'r cynllun pensiwn yn seiliedig ar gyflog.

Mae swyddog Prydeinig yr undeb, Jennie Formby, wedi dweud: "Gweithwyr caled sydd wedi codi Unilever i'r statws byd-eang presennol ond yn fuan bydd cwsmeriaid yn adnabod y cwmni fel un sy'n farus gyda'u pensiynau yn hytrach na'u cynnyrch."

Mae Unilever wedi dweud y bydd bron 90% o'r gweithlu yn cadw 80% neu fwy o'u pensiynau.

Dywedodd llefarydd: "Y realiti yw bod cynrychiolwyr yr undebau wedi cael cyfleoedd i ddylanwadu ar ganlyniad yr ymgynghoriad ym mis Hydref ond, yn anffodus, fe wnaethon nhw adael y trafodaethau.

"Roedd gwneud y newidiadau yn ddewis anodd ond angenrheidiol sy'n adlewyrchu realiti'r farchnad a disgwyliad oes hirach."

Mae'r ffatri yng Nghrymlyn ger y Coed Duon wedi bod yn cynhyrchu Pot Noodle am dros 30 mlynedd, gan gynhyrchu 155 miliwn pot o'r byrbryd bob blwyddyn.

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.