Y Gweilch yn penodi Steve Tandy fel prif hyfforddwr

Steve Tandy Image copyright Huw Evans picture agency
Image caption Chwaraeodd Steve Tandy 102 o weithiau i'r Gweilch rhwng 2003 a 2010.

Mae'r Gweilch wedi penodi Steve Tandy fel eu Prif Hyfforddwr yn lle Sean Holly.

Ac mae cyfarwyddwr hyfforddi'r tîm, Scott Johnson, wedi penderfynu gadael y clwb wythnosau yn gynt na'r disgwyl.

Bydd Tandy, 32 oed, yn cymryd yr awenau am y tro cyntaf pan fydd Y Gweilch yn herio Aironi yn Stadiwm y Liberty nos Wener.

Bydd Tandy, sy'n hanu o Donmawr ger Port Talbot, yn cael ei gynorthwyo gan hyfforddwr y blaenwyr, Jonathan Humphreys.

Chwaraeodd Tandy 102 o weithiau i'r Gweilch rhwng 2003 a 2010.

'Profiad gwych'

Fe fydd yn rhoi'r gorau i'w swydd fel hyfforddwr Pen-y-bont ar Ogwr.

"Mae hwn yn gyfle gwych i mi ac rwyf wedi cynhyrfu'n lân wrth feddwl am yr hyd sydd i ddod," meddai.

"Gweithiais yn galed i ddatblygu fel hyfforddwr pan roeddwn i'n dal i chwarae i'r Gweilch ac roeddwn i'n ffodus i fod yn aelod o glwb sy'n gwerthfawrogi datblygu hyfforddwyr.

"Mae hyn wedi fy ngalluogi i gael profiad gwych gyda'r Gweilch a Phen-y-bont ar Ogwr."

Roedd Holley yn gynorthwyydd i gyn-reolwr y Gweilch, Lyn Jones, pan sefydlwyd y rhanbarth yn 2003.

Pan adawodd Jones ym mis Mai 2008, Holley a chyn-gapten Cymru Jonathan Humphreys, oedd yn gyfrifol am Y Gweilch.

Bydd Johnson yn ymuno â thîm hyfforddi'r Alban ddiwedd y tymor.

Ond mae'r Gweilch wedi derbyn ei gynnig i ymddiswyddo yn syth.

Dywedodd cyfarwyddwr y Gweilch, Mike Cuddy, ei fod yn amser i "fywiogi pethau".

"Mae Sean yn cytuno ei fod yn amser iddo dderbyn her newydd ac mae'n rhoi cyfle iddo ef a'r Gweilch i gamu ymlaen," meddai.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.