Archesgob i siarad am waith Waldo Williams

Archesgob Caergaint, y Dr Rowan Williams Image copyright (C) British Broadcasting Corporation
Image caption Mae Dr Williams eisoes wedi cyfieithu cerddi Waldo Williams i'r Saesneg

Gwaith Waldo Williams yw testun darlith Archesgob Caergaint ym mis Mawrth.

Mae Dr Rowan Williams yn edmygu'n fawr waith y bardd a'r heddychwr o Sir Benfro, un o feirdd mwya'r ganrif ddiwetha.

Eisoes mae wedi cyfieithu cerddi Waldo i'r Saesneg ac fe fydd y ddarlith yng Nghapel Pisgah, Llandysilio, Sir Benfro, ar Fawrth 23.

Cymdeithas Waldo, y mudiad gafodd ei sefydlu i goffáu bywyd y bardd, sydd wedi ei wahodd.

Ganwyd Waldo ym 1904 yn fab i ysgolfeistr yn Hwlffordd.

Carreg goffa

Ysgrifennodd ei farddoniaeth fwyaf ingol yn ystod y blynyddoedd wedi ffrwydro'r bomiau atomig ar Hiroshima a Nagasaki.

Lluniodd hefyd nifer o gerddi am genedlaetholdeb, gan gynnwys Preseli, Cymru'n Un, a Cymru a'r Gymraeg.

Cyhoeddodd ei unig gyfrol o farddoniaeth, Dail Pren, yn 1956.

Bu farw ym 1971 a'i gladdu ym mynwent Capel Blaenconyn rhwng Llandysilio a Chlunderwen.

Saif carreg goffa ger Mynachlog-ddu gyda'r arysgrif syml 'Waldo 1904-1971' arni.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.