Verheijen yn ymddiswyddo

Gary Speed a Raymond Verheijen Image copyright Huw Evans picture agency
Image caption Raymond Verheijen (dde) oedd dirprwy Gary Speed gyda thîm Cymru

Mae'r hyfforddwr Raymond Verheijen wedi ymddiswyddo o'i ddyletswyddau gyda thîm pêl-droed Cymru gan gyhuddo Cymdeithas Bêl-droed Cymru o chwarae "gemau gwleidyddol a dinistriol."

Cafodd y dyn di-flewyn-ar-dafod ei benodi yn ddirprwy reolwr gan Gary Speed, cyn reolwr Cymru.

Mae Cymru wedi ennill pedair o'u pum gêm ddiwethaf.

Ond bu ansicrwydd ynglŷn â dyfodol Verheijen yn dilyn marwolaeth Speed.

Mae rheolwr newydd Cymru, Chris Coleman, wedi cynnal trafodaethau gyda Verheijen ac Osian Roberts.

Roberts a Verheijen oedd i fod yn gyfrifol am y tîm cenedlaethol yn y gêm gyfeillgar er cof am Gary Speed yn erbyn Costa Rica ddydd Mercher.

Roedd Roberts wedi dweud eu bod yn obeithiol y byddai'r tri ohonynt, ynghyd â'r dirprwy reolwr newydd Kit Symons yn gallu cyd-weithio gyda'i gilydd.

Twitter

Ddydd Gwener ar wefan Twitter dywedodd Verheijen: "Yn gynharach heddiw fe roddais wybod i Gymdeithas Bêl-droed Cymru y byddaf yn ymddiswyddo. Cael digon o'u gemau gwleidyddol a dinistriol. Diwrnod trist iawn.

"Y tîm oedd yr un wnaeth ddangos y gwelliant mwyaf o holl dimau FIFA yn 2011 ac rwy'n falch o fod yn rhan o hynny.

"Rwyf am ddiolch i'r chwaraewyr a'r cefnogwyr am siwrne anhygoel".

Dywedodd Cymdeithas Bêl-droed Cymru mai gyda siom yr oeddynt yn derbyn ymddiswyddiad Verheijen cyn y gêm yn erbyn Costa Rica.

"Yng ngoleuni'r gêm ddydd Mercher, a sensitifrwydd yr amgylchiadau, dyw'r Gymdeithas ddim am wneud sylw pellach ar hyn o bryd.

"Rydym yn diolch i Raymond am ei waith dros y 12 mis diwethaf, ac yn dymuno'n dda iddo yn y dyfodol."

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.