Tri'n anelu am drydedd Gamp Lawn o fewn wyth mlynedd

Adam Jones, Gethin Jenkins a Ryan Jones Image copyright (C) British Broadcasting Corporation
Image caption Mae'r tri eisioes wedi ennill y Gamp Lawn ddwywaith

Gallai enwau tri o aelodau carfan Cymru fod yn y llyfrau hanes os yw Cymru'n trechu Ffrainc ddydd Sadwrn.

Mae Adam Jones, Gethin Jenkins a Ryan Jones eisoes wedi ennill y Gamp Lawn ddwywaith.

Os oes buddugoliaeth yn Stadiwm y Mileniwm dros y penwythnos bydd y tri'n ennill eu trydedd Gamp Lawn.

Fe fyddan nhw'n ymuno â'r tri o'r 1970au, Gerald Davies, JPR Williams a Gareth Edwards, gyflawnodd y gamp.

Dywedodd un o'r hyfforddwyr, Robin McBryde, fod profiad Adam, Gethin a Ryan yn allweddol ym mharatoadau'r garfan.

Tri mewn wyth tymor

"Mae eu dylanwad ar y chwaraewyr yn allweddol.

"Fe fyddwn ni'n disgwyl iddyn nhw rannu eu gwybodaeth gyda'r rhai iau yn ystod yr wythnos."

Image copyright (C) British Broadcasting Corporation
Image caption Gallai Cymru ennill y Bencampwriaeth a'r Gamp Lawn ddydd Sadwrn

Os ydyn nhw'n llwyddo, hon fydd trydedd Gamp Lawn Cymru mewn wyth tymor.

Mike Ruddock oedd wrth y llyw yn 2005 pan wnaeth y tîm cenedlaethol ennill y Gamp Lawn, y tîm cyntaf i wneud hynny, gan chwarae mwy o gemau oddi cartref nac adref.

Erbyn 2008 roedd yr hyfforddwr presennol, Warren Gatland, wrth y llyw.

Y gêm ddydd Sadwrn fydd y tro cyntaf i Gymru wynebu Ffrainc ers iddyn nhw golli o 9-8 yn eu herbyn yn rownd gynderfynol Cwpan Rygbi'r Byd yn Seland Newydd fis Hydref.

'Symud ymlaen'

"Fe ddylen ni fod wedi ennill y gêm yna ond wnaethon ni ddim," meddai Adam.

"Rydyn ni wedi symud ymlaen. Rydyn ni'n edrych ymlaen at ddydd Sadwrn a ddim yn poeni am y gorffennol."

Dywedodd fod y pwysau ar y garfan sydd wedi curo Iwerddon, Yr Alban, Lloegr a'r Eidal yn enfawr.

Ond fe fydd y garfan yn gallu dygymod â hynny, meddai.

"Rydyn ni'n ymwybodol o'r hyn sy'n mynd ymlaen ac mae'n wythnos fawr, wythnos y Gamp Lawn."

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.