Ysgol â thri disgybl i gau yn Sir Gaerfyrddin

Disgyblion (generic) Image copyright (C) British Broadcasting Corporation
Image caption Mae nifer y disgyblion yn yr ysgol wedi bod yn gostwng

Fe fydd un o ysgolion cynradd Sir Gaerfyrddin yn cau yn yr haf.

Ar ddiwedd tymor yr haf fydd 'na ddim plant yn Ysgol Gynradd Cwmifor ger Llandeilo.

Tri o ddisgyblion sydd ar gofrestr yr ysgol ar ddechrau'r flwyddyn addysgol yn hydref 2011.

Cyngor Sir Caerfyrddin sydd wedi gwneud y penderfyniad i gau'r ysgol.

Mae'r penderfyniad yn dod wedi i adran addysg y cyngor gynnal ymgynghoriad gyda'r gymuned leol.

Mae teuluoedd nawr yn cael opsiwn i gofrestru plant yn Ysgol Gymraeg Teilo Sant neu Ysgol Llandeilo.

"Rydym yn cydnabod bod hwn yn newyddion trist iawn i'r gymuned a bod 'na berthynas hir a hapus wedi bod gyda'r ysgol," meddai Cyfarwyddwr Addysg y Cyngor, Rob Sully.

"Ond mae nifer y disgyblion yn yr ysgol wedi bod yn gostwng dros y blynyddoedd diwethaf ac o safbwynt addysgol mae wedi bod yn anodd cyflwyno'r amrywiaeth llawn o brofiadau addysgol a chymdeithasol i'r disgyblion.

"Rydym wedi gorfod ystyried felly, budd hirdymor y disgyblion.

"Rydym wedi ymgynghori gyda'r gymuned a does neb wedi gwrthwynebu'r cynlluniau i gau."

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.