Amgueddfa forwrol yn cau am byth

Amgueddfa Morwrol Seiont II Caernarfon Image copyright (C) British Broadcasting Corporation
Image caption Mae'r amgueddfa mewn adeilad bychan yn Noc Fictoria, Caernarfon

Fe fydd amgueddfa forwrol yng Ngwynedd yn cau'r drws am byth wrth i'r elusen sy'n ei rheoli ddod i ben.

Gwirfoddolwyr sy'n gyfrifol am amgueddfa forwrol Seiont II yn Noc Fictoria, Caernarfon.

Mae'n debygol y bydd Cyngor Gwynedd yn cymryd gofal o'r eitemau er y bydd eitemau sydd ar fenthyg yn dychwelyd i'r perchnogion.

Dywedodd llefarydd ar ran y cyngor bod y penderfyniad i gau yn siomedig ond eu bod yn deall yr anawsterau.

"Mae'r cyngor wedi bod yn cefnogi'r ymddiriedolwyr wrth iddyn nhw symud ymlaen i ddod â'r cyfan i ben," meddai llefarydd.

"Mae'n bosib y bydd y rhan fwyaf o eitemau'r amgueddfa yn cael eu trosglwyddo i Wasanaeth Amgueddfeydd Cyngor Gwynedd."

Dywedodd bod trafodaethau yn parhau am y posibilrwydd o arddangos eitemau o fewn rhwydwaith amgueddfeydd ac orielau Gwynedd yng Nghaernarfon a Bangor.

"Yr hyn sy'n bwysig i'r cyngor yw bod y casgliadau yn cael eu diogelu," ychwanegodd.

"Rydym am roi teyrnged i waith y gwirfoddolwyr a'r ymddiriedolwyr sydd wedi gweithio yn ddiflino yn yr amgueddfa dros y blynyddoedd."