Symud gwasanaeth llygaid o HM Stanley i Abergele

Ysbyty HM Stanley Image copyright BBC news grab
Image caption Mae Ysbyty HM Stanley wedi bod yn darparu triniaeth llygaid am bron i 60 mlynedd

Fe fydd y triniaethau llygaid olaf yn cael eu cynnal yn Ysbyty HM Stanley, Llanelwy, ddydd Iau.

Fe fydd y gwasanaeth a oedd yn cael ei ddarparu yno yn cael ei wneud o Ebrill 16 ymlaen yn yr uned newydd yn Ysbyty Abergele ochr yn ochr â gwasanaeth orthopedig.

Unwaith y bydd yr uned orthopedig wedi symud i Ysbyty Glan Clwyd fe fydd yr uned llygaid yn gallu ehangu i gynnig mwy o wasanaethau yn Abergele.

Dywed swyddogion iechyd y bydd y dechnoleg ddiweddaraf yn cael ei defnyddio wrth drin cleifion.

Mae'r uned yn darparu triniaeth frys ond fydd dim modd i gleifion gyrraedd yn ddirybudd.

'Ymgartrefu'

"Rydym yn edrych ymlaen at symud i Abergele er mwyn cynnig gwell adnoddau i gleifion," meddai Roger Haslett, Arweinydd Clinigol Offthalmoleg.

"Fe fydd 'na theatrau newydd, wardiau a chanolfan driniaeth macwlâu.

"Yn naturiol fe fydd yn cymryd amser i'r tîm ymgartrefu.

"Ond rydym yn hyderus y gallwn adeiladu ar y gwasanaeth blaenorol sydd wedi cael ei gynnig am y 58 mlynedd diwethaf yn Ysbyty HM Stanley.

"Fe fyddwn ni hefyd yn gallu darparu'r gwasanaeth addas i gleifion yn 2012 a thu hwnt."

Bydd angen i gleifion sydd angen triniaeth frys gysylltu â'r uned yn gyntaf.

Yr uned frys yn Ysbyty Glan Clwyd sy'n gyfrifol am ddarparu triniaeth brys y tu allan i'r oriau arferol.

Bydd yr uned newydd yn Abergele yn darparu gwasanaeth trin llygaid ar gyfer siroedd Conwy, Dinbych a Fflint.

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.