Twrci'n crwydro'r strydoedd

Twrci Image copyright RSPCA
Image caption Roedd y twrci'n crwydro strydoedd Cilâ yn Abertawe

Mae'r gymdeithas gwarchod anifeiliaid, yr RSPCA, yn apelio am wybodaeth wedi i dwrci gael ei gweld yn crwydro strydoedd Abertawe.

Cafodd y gymdeithas alwad gan yrrwr a welodd y twrci benywaidd brown a du ar Fai 15 wrth yrru ar stryd ym Mhentre Banadl, Cilâ.

Gwelodd nifer o drigolion eraill yr aderyn, ond llwyddodd y gyrrwr i gornelu'r twrci yn ei garej cyn ffonio'r RSPCA.

Dywedodd un o swyddogion yr RSPCA, Paula Milton: "Anaml iawn y byddwn yn derbyn galwad i achub twrci, ond mae'n hanfodol bod perchennog yr aderyn yma'n cysylltu gyda ni cyn gynted â phosib."

Mae'r twrci bellach yng ngofal yr RSPCA.

Os oes gan rywun wybodaeth am y digwyddiad, maen nhw'n cael eu hannog i gysylltu â llinell wybodaeth a chreulondeb yr RSPCA ar 0300 1234 999.

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.