Tad yn galw ar wleidyddion i achub catrawd

Ray Scanlon
Image caption Mae Ray Scanlon wedi galw ar wleidyddion i achub y gatrawd

Mae tad milwr o'r Cymoedd, a laddwyd yn Afghanistan, wedi galw ar Lywodraeth San Steffan i achub ei gatrawd.

Cafodd yr is gorporal Richard Scanlon, 31 oed o Rymni, Sir Caerffili, ei ladd yn nhalaith Helmand fis Tachwedd y llynedd.

Roedd yn aelod o gatrawd y Queen's Dragoon Guards - sydd hefyd yn cael ei adnabod fel y Cafalri Cymreig.

Nawr mae pryder y gallai'r gatrawd gael ei huno wrth i'r fyddin geisio arbedion ariannol.

Dim penderfyniad

Gwnaeth y tad, Ray Scanlon, ei sylwadau wrth i'r gatrawd baratoi ar gyfer dwy orymdaith yng Nghymru ar ôl dychwelyd adref o Afghanistan.

Image copyright PA
Image caption Bu farw Richard Scanlon mewn ffrwydrad yn Afghanistan

Dywedodd swyddogion o'r Weinyddiaeth Amddiffyn nad oes yna benderfyniad terfynol wedi ei wneud.

Mae'r llywodraeth yn bwriadu lleihau nifer y milwr o 102,000 i 82,000 erbyn 2020.

Ym mis Mai dechreuwyd ymgyrch i achub y gatrawd ar ôl sïon y byddai'r gatrawd yn cael ei huno ac y byddai 500 o filwyr yn cael eu diswyddo.

Mae'r gatrawd yn cael ei hadnabod fel y Cafalri Cymreig oherwydd bod y rhan fwyaf yn cael eu recriwtio o Gymru.

Dywedodd Ray Scanlon y byddai penderfyniad i gael gwared ar yr enw yn sarhad.

'Troi yn ei fedd'

Siaradodd wrth i'r gatrawd baratoi i orymdeithio drwy strydoedd Abertawe a Chaerdydd.

"Byddai fy mab yn troi yn ei fedd pe bai'n gwybod fod hyn yn digwydd," meddai.

"Mae'r bechgyn hyn newydd ddod yn ôl o Afghanistan, wedi colli dau o'u ffrindiau, a nawr maen nhw'n clywed bod hi'n bosib y byddant yn colli'r gatrawd.

Dywed Mr Scanlon y dylid cadw'r Queen's Dragoon Guards a'r ddwy gatrawd arall o Gymru - y Gwarchodwyr Cymreig a'r Cymry Brenhinol.

Dywedodd y dylai gwleidyddion o Gymru fynd â'u brwydr at Lywodraeth San Steffan.

Ddydd Sul bydd yna wasanaeth er cof am yr is gorporal Scanlon a'r is gapten David Boyce o Sir Hertford yng nghadeirlan Llandaf, Caerdydd.

Cafodd y ddau eu lladd gan ffrwydrad yn ardal Nahr-e-Saraj.

Bydd y gatrawd yn gorymdeithio drwy Abertawe ddydd Mercher, ac yna Caerdydd ddydd Sadwrn

Straeon perthnasol