Gareth Thomas i ymddangos mewn pantomeim

Gareth Thomas Image copyright Stiwt Theatre and LHK Production Ltd
Image caption Bydd Gareth Thomas yn ymddangos yn Aladdin yn Theatr y Stiwt ger Wrecsam

Bydd cyn-gapten rygbi Cymru, Gareth Thomas, yn cymryd rhan mewn pantomeim am y tro cyntaf.

Bydd Thomas, sydd yn 37, yn chwarae rhan y genie yn Aladdin yn Theatr y Stiwt yn Rhosllannerchrugog, ger Wrecsam.

Ers gorffen chwarae rygbi mae Thomas wedi ymddangos sawl gwaith ar y teledu, gan gynnwys cymryd rhan yn sioe 'Celebrity Big Brother'.

Yn ddiweddar ymddangosodd ar raglen cariad@iaith lle enillodd gystadleuaeth i ddysgu Cymraeg.

"Dwi ddim yn un i anwybyddu her a rhoi tro ar rywbeth newydd," meddai.

"Felly pan gefais i'r cyfle yma roeddwn i'n meddwl ei bod yn rhy dda i beidio â'i gymryd."

Dywedodd hefyd ei bod yn edrych ymlaen at gwrdd â hen ffrindiau, gan iddo chwarae rygbi yn ardal Wrecsam am ddwy flynedd.

Bydd y pantomeim yn dechrau ar Ragfyr 11 ac yn gorffen ar Ionawr 2 2013.

Dywedodd reolwr y theatr, Rebecca Griffiths, bod Gareth yn "bersonoliaeth enfawr".

"Mae yn eicon Cymraeg ac mae ganddo yrfa wych gyda dilynwyr byd-eang.

"Bydd ei bresenoldeb ar y llwyfan yn chwarae rhan y Jînî yn epig."

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.