Hwb ariannol o dros £3m i gynllun Pontio ym Mangor

Canolfan Pontio
Image caption Mae disgwyl i'r ganolfan agor yn 2014

Mae canolfan arloesedd a chelfyddydol ym Mangor wedi cael hwb o £3,250,000 gan Gyngor Celfyddydau Cymru.

Mae disgwyl i ganolfan Pontio fod ar agor yn 2014.

Fe fydd 'na "theatr hyblyg," lle i 450 o seddi, sinema, stiwdio a lle i 120 o seddi a gofod perfformio tu allan i'r ganolfan £44 miliwn.

Bydd yr adeilad ar hen safle Undeb Myfyrwyr Prifysgol Bangor a Theatr Gwynedd. Arweinwyr y prosiect yw Prifysgol Bangor.

'Gwych'

"Mae'n newyddion gwych i Fangor, Cymru a'r tu hwnt," meddai Is-ganghellor Prifysgol Bangor, yr Athro John Hughes.

"Bydd y gymuned ar ei hennill am fod hwb i fuddsoddi ac adfywio yn y gogledd.

"Mae'n manteisio ar sgiliau ac arbenigedd lleol i greu a chadw cannoedd o swyddi a chyfleoedd busnes ..."

Yn ôl y cyngor, fe fydd Pontio yn bwerdy diwylliannol ac economaidd i'r ddinas ac yn llwyfan addas i'r goreuon o'r cwmnïau lleol.

Bydd yn cynnal digwyddiadau artistig rhanbarthol, cenedlaethol a rhyngwladol.

Mae hefyd yn cynnwys cyfleusterau dylunio rhyngddisgyblaethol ar gyfer cynhyrchion, prosesau a gwasanaethau newyddion.

Uchelgeisiol

Bydd y celfyddydau a'r gwyddorau yn cael eu dysgu er budd y gymuned, busnesau lleol a myfyrwyr y Brifysgol.

Dywedodd Dr Kath Davies, Cyfarwyddwr Gwasanaethau Buddsoddi ac Ariannu Cyngor Celfyddydau Cymru, fod y prosiect yn uchelgeisiol.

"Mae ganddo bosibiliadau i greu lle ysbrydoledig i'r celfyddydau perfformio a digwyddiadau artistig syfrdanol ar gyfer gwahanol gynulleidfaoedd."

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.