Codi arian yn eu dillad isa' yn Nyffryn Conwy

Taith BrasGamu 2012 Image copyright O
Image caption Eleni fe estynwyd y gwahoddiad i ddynion ymuno yn y daith

Roedd mwy nag erioed wedi dod at ei gilydd eleni i gerdded 26 milltir yn eu dillad isa'.

Eu bwriad yw codi arian ar gyfer unedau canser yn ysbytai Llandudno a Glan Clwyd.

Roedd y merched a dynion yn cerdded o Ysbyty Ifan i Bentrefoelas.

Cychwynnodd y daith o Ysbyty Ifan am 8.30am cyn gorffen yng Ngwesty'r Foelas, Pentrefoelas.

Roedd 90 o gerddwyr o ardal Ysbyty Ifan a'r fro wedi dod ynghyd i gerdded yn eu tronsiau a bra.

"Roedd mwy nag erioed wedi cofrestru eleni a phawb yn cyflawni'r daith mewn 7 awr," meddai Siwan Hywel, un o'r trefnwyr.

"Fe wnaethom gasglu llawer o arian er budd dwy elusen arbennig.

"Roedd hi'n braf oedd gweld cymaint o ddynion wedi dod i gefnogi BrasGamu a Thrôns Gwlad.

"Roedd y merched wedi addurno eu bra's yn ddel.

"Mi oedden ni gyd yn meddwl am y rhai sy'n brwydro drwy ganser ar bob cam o'r daith."

Unedau lleol

Nid dyma'r tro cyntaf iddyn nhw fynd ati i godi arian, ond hyd eleni merched sydd wedi bod yn gwneud y cerdded.

Dywedodd Siwan Hywel bod y merched wedi bod yn gwneud y daith ers tair blynedd bellach.

"Ond roedden ni'n awyddus i'r dynion beidio colli allan eleni.

"Roeddan ni eisiau dynion i godi ymwybyddiaeth, casglu arian a cherdded y daith Drôns Gwlad."

Bydd yr arian eleni yn mynd at ddwy elusen, Uned Canser y Fron yn Ysbyty Llandudno ac Uned Canser y Ceilliau yn Ysbyty Glan Clwyd.

Y llynedd casglwyd £4,000 tuag at elusennau, Uned Canser y Fron yn Ysbyty Llandudno; Canolfan Trin Canser Gogledd Cymru yn Ysbyty Glan Clwyd; Ymatebwyr Cyntaf Uwchaled ac Ambiwlans Awyr Gogledd Cymru.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.