Methiant y Cymro Christian Malcolm yn y ras gyfnewid

Christian Malcolm a Dwain Chambers Image copyright Getty Images
Image caption Chafodd y baton ddim ei drosglwyddo'n gywir rhwng Christian Malcolm a Dawain Chambers

Roedd 'na siom i dîm gyfnewid Prydain wrth i'r pedwar fethu cwblhau'r rownd derfynol 4x100m ym mhencampwriaethau Ewrop yn Helsinki.

Methodd y Cymro Christian Malcolm a throsglwyddo'r baton i Dwain Chambers o fewn yr ardal benodol.

Y ddau arall yn y tîm yw James Ellington a Mark Lewis-Francis.

Daw'r ras ddiwrnod ar ôl i ferched Prydain 4z100m gael eu diarddel pan ddyfarnwyd bod Hayley Jones wedi camu allan o'i lôn.

Yr Iseldiroedd enillodd y ras i ddynion.

"Dwi'n cymryd y cyfrifoldeb," meddai Malcolm.

"Fe golles i fomentwm. Fy ngwaith i ydi sicrhau bod y baton yn cyrraedd Dwain a wnes i fethu.

"Roedd yn gyfle i ni gyd ac fe fethon ni.

"Roeddem yn meddwl y byddem yn ennill. Roeddem yn barod.

"Dyw e ddim yn fater o ddiffyg ymarfer."

Mae Malcolm wedi ennill lle yn ras y 200m yn y Gemau Olympaidd eisoes a hynny am y pedwerydd tro.