Hartson yn datgelu swydd Cymru

John Hartson Image copyright Getty Images

Mae John Hartson wedi datgelu ei fod wedi derbyn swydd yn nhîm hyffordi Chris Coleman gyda Chymru.

Fe wnaeth y cyhoeddiad yn ei golofn mewn papur newydd yn yr Alban.

Ysgrifennodd Hartson: "Gofynnodd Chris yn syml os fyddwn i am fynd i weithio gydag e.

"Fe wnes i dderbyn ar unwaith, ysgwyd ei law, ac addo y byddwn yn gwneud unrhyw beth posibl i helpu i wneud Cymru yn dîm rhyngwladol llwyddiannus."

Nid yw Cymdeithas Bêl-droed Cymru wedi ymateb hyd yma.

Ymddangosodd Hartson 51 o weithiau i Gymru gan sgorio 14 gôl i'w wlad yn ystod gyrfa gyda chlybiau Arsenal, Celtic a West Ham.

Yn fwy diweddar daeth i sylw'r cyhoedd oherwydd ei frwydr lwyddiannus yn erbyn canser y ceilliau.

Cafodd Chris Coleman ei benodi'n rheolwr Cymru yn Ionawr 2012 yn dilyn marwolaeth ei ragflaenydd Gary Speed yn Nhachwedd 2011, ond roedd Hartson wedi mynegi diddordeb yn y swydd cyn i Coleman gael ei benodi.

Ychwanegodd Hartson: "Mae pawb yn gwybod cymaint o wladgarwr ydw i. Rwy'n siarad yr iaith.

"Fel bachgen o Abertawe - fel Chris fel mae'n digwydd - mae'n wych cael bod yn rhan o'r tîm.

"Mae cael cynorthwyo Chris ac, i bob pwrpas, ateb galwad gan fy ngwlad yn anrhydedd fawr i mi.

"Oherwydd hynny byddaf yn rhoi'r gorau i fy ngwaith ar y cyfryngau er mwyn medru perfformio hyd eithaf fy ngallu."

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.