Chwilio am ddyn a frathodd ferch 14 oed ar drên

Llun CCTV Image copyright BTP
Image caption Mae'r heddlu yn awyddus i holi'r dyn yma a welwyd ar gamera cylch cyfyng

Mae Heddlu Trafnidiaeth Prydain wedi cyhoeddi lluniau o gamera cylch cyfyng o ddyn y maen nhw am ei holi wedi ymosodiad ar ferch 14 oed ar drên.

Cafodd y ferch ei brathu ar ei hwyneb, ac fe gafodd gleisiau yn ogystal.

Digwyddodd yr ymosodiad am tua 4:40pm ar ddydd Sadwrn, Mehefin 2, wrth i'r trên gyrraedd gorsaf Aberdâr.

Dywedodd yr heddlu bod y ferch wedi mynd ar y trên ym Mhontypridd, ac yn ystod y daith fe aeth i ddadlau gyda dyn.

Wrth i'r ferch adael y trên yn Aberdâr, fe ymosodd y dyn arni gan achosi cleisiau i'w gwyneb a brathiad ar ei thalcen.

'Profiad brawychus'

Dywed yr heddlu eu bod yn awyddus i siarad gyda dyn oedd yn gwisgo crys-T Nike a chap fflat du.

Roedd ei wallt wedi ei dorri mewn modd 'Mohican' arbennig.

Maen nhw'n credu iddo fynd ar y trên yng Nghwmbach.

Dywedodd Cwnstabl Nigel Maggs: "Roedd hwn yn ddigwyddiad cas a adawodd y ferch gydag anafiadau ac mewn gofid. Roedd yn brofiad brawychus iddi hi.

"Mae ymddygiad fel hyn yn gwbl annerbyniol, ac ni fyddwn yn ei ddioddef ar y rhwydwaith drenau.

"Mae'n hanfodol i ni adnabod y person oedd yn gyfrifol am yr ymosodiad yma, ac rwy'n annog unrhyw un sydd â gwybodaeth i gysylltu gyda'r heddlu."

Gofynnodd yr heddlu i bobl allai gynnig gwybodaeth fyddai'n cynorthwyo'r ymchwiliad i ffonio Heddlu Trafnidiaeth Prydain ar 0800 405040, gan nodi'r cyfeirnod B4/WCA ar 9/7/2012, neu fe all pobl ffonio Taclo'r Tacle yn ddi-enw ar 0800 555111.

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.