Golff: Price yn gorffen yn dda

Philip Price Image copyright Getty Images
Image caption Gorffennodd Price yn y deg uchaf am yr ail dro'r tymor hwn

Cafodd Philip Price wythnos ardderchog ym Mhencampwriaeth Golff Agored yr Alban ar gwrs Castle Stewart.

Gorffennodd y Cymro yn gydradd wythfed a hynny 14 ergyd yn well na'r safon - tair ergyd y tu ôl i'r enillydd.

Gorffennodd Francesco Molinari o'r Eidal a Jeev Milkha Singh o India yn gyfartal ar y brig, gyda Singh yn mynd â hi ar y tyllau ychwanegol.

Dyma'r ail dro i Price orffen yn y deg uchaf y tymor hwn ar gylchdaith Ewrop gan iddo orffen yn drydydd yn y Trophée Hassan ym mis Mawrth.

Roedd Price yn un o'r ddim ond dau gystadleuydd gafodd sgôr o llai na 70 ymhob rownd.

Roedd Cymro arall, Rhys Davies, wedi mwynhau'r gystadleuaeth yn ogystal, ond cafodd rownd olaf siomedig yn yr Alban.

Pencampwriaeth Agored yr Alban - Canlyniad :-

=1. Jeev Milkha Singh (India) = -17 (66;70;68;67) - Singh enillodd ar y twll ychwanegol cyntaf

=1. Francesco Molinari (Yr Eidal) = -17 (62;70;67;72)

=8. Philip Price (Cymru) = -14 (68;69;68;69)

=58. Rhys Davies (Cymru) = -5 (72;68;68;75)