Codi ymwybyddiaeth am ganser wrth gario'r Fflam Olympaidd

Dafydd Jones Image copyright Beating Bowel Cancer
Image caption Credir bod Dafydd Jones ymhlith y talaf i gludo'r Fflam

Mae Cymro yn gobeithio codi ymwybyddiaeth am ganser y coluddyn wrth gario'r Fflam Olympaidd.

Cafodd Dafydd Jones ei enwebu gan yr elusen Beating Bowel Cancer mewn cydnabyddiaeth o'i waith i godi ymwybyddiaeth am y salwch.

Bydd Mr Jones yn cludo'r Fflam yn Llundain.

Cafodd y gŵr sy'n wreiddiol o Borthmadog, ddiagnosis o ganser y coluddyn yn 2009, pan oedd yn 26 mlwydd oed.

"Mae'n anrhydedd mawr i gario'r fflam fel dyn o Gymru drwy strydoedd de Llundain, nid yn unig yn chwifio'r faner dros Gymru, ond ar gyfer yr elusen Beating Bowel Cancer hefyd," meddai.

"Dwi'n awyddus i dynnu sylw at y ffaith y gall ddigwydd i bobl o unrhyw oedran.

"Byddaf yn cario'r Fflam i gynrychioli'r holl fywydau a gollwyd yn greulon i ganser y coluddyn a'r holl arloeswyr anhygoel sydd wedi curo'r clefyd."

'Nerfus iawn'

Mae Mr Jones wedi byw yn Llundain ers 2004 ac mae'n gweithio yn y sector ariannol.

Honnir mai fe yw'r person talaf i gario'r fflam, gan ei bod yn 6'7" o daldra.

"Dwi'n gobeithio ceisio trefnu trowsus hirach i fynd gyda'r wisg maen nhw'n darparu oherwydd ei fod rhyw bum modfedd yn rhy fyr!" dywedodd.

Bydd yn cario'r fflam yn Croydon, de Llundain.

Yno i'w wylio y bydd ei Aelod Seneddol lleol, Tessa Jowell.

"Mae'r gwaith mae Dafydd wedi ei wneud i godi arian at elusen canser y coluddyn yn rhyfeddol," meddai Ms Jowell.

Yn ogystal dywedodd Mr Jones ei fod wedi cael neges o gefnogaeth gan y darlledwr Huw Edwards.

Er yr holl gefnogaeth dywedodd Mr Jones ei fod yn "nerfus iawn".

"Dwi'n gobeithio dwi ddim yn mynd i ollwng y fflam," meddai.

Ond dywedodd ei bod yn falch o gael y cyfle.

"Mae'n neis bod pobl Cymraeg sy'n byw yn Llundain yn cael yr anrhydedd hefyd."

Mae Mr Jones wedi codi tua £8,000 dros Beating Bowel Cancer yn ystod yr 18 mis diwethaf.

Mae'n arwerthu nifer o eitemau, gan gynnwys basged o nwyddau o siop Harrods, ar wefan er mwyn ceisio codi £2,000 arall.

Bydd yn cario'r Fflam ddydd Llun Gorffennaf 23 tua 1.53pm.

Straeon perthnasol

Hefyd ar y BBC

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.