Meddalwedd newydd yn helpu pobl ddall

Person yn defnyddio cyfrifiadur
Image caption Bydd y feddalwedd newydd yn helpu pobl pobl ddall a phobl â golwg rhannol

Mae lleisiau testun-i-lafar Cymraeg newydd ar gael i'r cyhoedd.

Datblygwyd y lleisiau gan Sefydliad y Deillion a'r cwmni meddalwedd testun-i-lafar IVONA.

Llywodraeth Cymru sydd wedi ariannu'r prosiect sy'n helpu pobl ddall a rhai â golwg rhannol.

'Cyffrous'

Bydd modd iddyn nhw fynd ar wefannau, cyfnewid negeseuon e-bost a darllen ac ysgrifennu dogfennau yn Gymraeg.

Un o'r rhai sy'n edrych ymlaen at ddefnyddio'r lleisiau newydd yw Elin Williams, myfyrwraig 17 oed.

"Mae datblygiad y feddalwedd yn gyffrous," meddai.

"Bydd y llais synthetig Cymraeg yn fy helpu i ddefnyddio'r cyfrifiadur yn fy mamiaith."

Dydi Elin ddim yn byw yng Nghymru a dywedodd ei bod yn edrych ymlaen at gadw mewn cysylltiad â'i theulu a ffrindiau adre drwy negeseuon e-bost a Facebook yn ei hiaith gyntaf.

'Yn haws'

"Gan fy mod yn gwneud fy ngwaith ar fy ngliniadur yn bennaf, bydd y llais Cymraeg newydd yn gwneud fy astudiaethau yn haws.

"Bydd yn caniatáu defnyddio'r rhyngrwyd i wneud ymchwil yn Gymraeg," meddai.

Dywedodd Ceri Jackson, Cyfarwyddwr Sefydliad y Deillion yng Nghymru: "Rwy'n falch iawn ein bod wedi gallu gweithio gydag IVONA a Llywodraeth Cymru i greu'r lleisiau yma.

'Am ddim'

"Yn well byth, rwy'n falch ein bod wedi gallu eu darparu am ddim.

"Am y tro cyntaf bydd siaradwyr Cymraeg yn cael yr un cyfle â rhai Saesneg i ddefnyddio gwefannau a dogfennau electronig.

"Gyda mwy a mwy o unigolion a sefydliadau yn defnyddio'r rhyngrwyd ... mae datblygiadau fel y lleisiau hyn yn hollbwysig i sicrhau bod pobl ddall a phobl â golwg rhannol yn cael yr un cyfle â phawb arall."

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.