Justin Edinburgh yn estyn ei gytundeb gyda Chasnewydd

Justin Edinburgh Image copyright Huw Evans picture agency
Image caption Mae Justin Edinburgh wedi bod wrth y llyw ers Hydref 2011

Mae rheolwr tîm pêl-droed Casnewydd, Justin Edinburgh, wedi arwyddo cytundeb tan ddiwedd tymor 2013-14.

Fe wnaeth Edinburgh, 42 oed, olynu Anthony Hudson ym mis Hydref 2011.

Oherwydd ei ddylanwad arhosodd y tîm yn y gynghrair ar ôl pryderon y byddai'r tîm yn disgyn.

Fe wnaeth y tîm hefyd gyrraedd rownd derfynol Tlws yr FA.

"Dwi'n falch o sicrhau fy addewid i'r clwb a dwi'n credu ein bod yn mynd i'r cyfeiriad cywir ar ac oddi ar y cae," meddai.

Rhannu maes

Fe ddaw'r cyhoeddiad ddiwrnod ar ôl y newyddion bod cadeirydd a chyfarwyddwr y clwb, Chris Blight, wedi ymddiswyddo ar ôl 10 mlynedd.

Roedd Blight yn gyfrifol am symud o Barc Spytty i rannu maes gyda Dreigiau Gwent ar Rodney Parade.

Fe wnaeth Edinburgh, cyn amddiffynnwr gyda Tottenham Hotspur, ennill Cwpan yr FA a Chwpan y Gynghrair tra oedd yn White Hart Lane.

"Mae'r cefnogwyr yn wych a dwi'n edrych ymlaen at eu croesawu i Rodney Parade, ein cartref newydd, y tymor nesaf," meddai.

"Hoffwn gymryd y cyfle i ddiolch i bawb yn y clwb am eu cefnogaeth."

Mae cynorthwy-ydd Edinburgh, Jimmy Dack, hefyd wedi estyn ei gytundeb.