Gemau Olympaidd: Busnesau ar eu hennill?

Stadiwm y Mileniwm
Image caption Mae'r gemau'n dechrau yng Nghaerdydd ddydd Mercher

Mae ystadegau oddi wrth Lywodraeth Cymru yn dangos bod cwmnïau o Gymru wedi ennill cytundeb sy'n werth mwy na £38 miliwn o ganlyniad i'r Gemau Olympaidd.

Ar y cyfan, roedd cytundebau gwerth £7 biliwn ar gael.

I raddau, mae'r arian ar gyfer cwmnïau o Gymru oherwydd buddsoddi mewn adnoddau chwaraeon "sy' wedi helpu denu timau 20 o wledydd i hyfforddi cyn y gemau".

Dywedodd Jonathan Jones, cyfarwyddwr marchnata twristiaeth y llywodraeth, fod y Gweinidog Busnes, Edwina Hart, wedi llywyddu digwyddiad ar gyfer dynion busnes a diplomyddion yn Llundain er mwyn denu mwy o fuddsoddi.

Cynhadledd

Bydd hi'n mynd i gynhadledd buddsoddi bydeang mewn twristiaeth yn Llundain ddydd Iau.

Wfftiodd Mr Jones feirniadaeth nad oedd y llywodraeth wedi gwneud digon i helpu busnesau.

"Mae 'na lawer o fusnesau bach wedi ennill cytundebau ond nid oes hawl gyda nhw i ddweud hyn," meddai.

Cwmni ym Mhort Talbot, Rhino Doors, sy' wedi cynhyrchu rhai o ddrysau'r Parc Olympaidd.

Cafodd cwmni o Landrindod waith ar y funud ola a Horsweigh gyflenwodd offer pwyso ceffylau.

Straeon perthnasol

Hefyd ar y BBC