Tram yn dathlu penblwydd

Tram Llandudno Image copyright Cyngor Conwy
Image caption Mae'r dramffordd yn cludo pobl i gopa'r Gogarth

Mae tramffordd Llandudno yn dathlu 110 mlynedd o gludo teithwyr i gopa'r Gogarth.

Dechreuodd y gwasanaeth ar Orffennaf 31 1902.

Dywedodd rheolwr y dramffordd, Neil Jones, mai rhan o'i swyn yw ei bod fel "taith yn ôl mewn amser".

"Mae'r tramiau wedi cael eu hadfer i edrych yn union fel y byddent 110 mlynedd yn ôl.

"Ac unwaith i chi adael Llandudno mae'r golygfeydd yn union fel y rhai y byddai eich neiniau a theidiau a'ch hendeidiau a hen-neiniau wedi gweld."

Syniad nifer o ddynion busnes y dref oedd dechrau adeiladu tramffordd i fyny'r Gogarth.

Roedd Llandudno'n tyfu fel cyrchfan gwyliau poblogaidd a byddai hyn yn eu galluogi i fanteisio ar y golygfeydd oddi yno.

Roedd ffyrdd i'r copa eisoes yn bodoli ond roedden nhw'n serth ac yn hir.

Image copyright Colin Paxton
Image caption Mae'r dramffordd yn dal i ddenu ymwelwyr i Landudno

Dechreuwyd adeiladu'r dramffordd ym mis Ebrill 1901 ac yng Ngorffennaf 1902 aeth y tram cyntaf i fyny'r Gogarth, gyda chynulleidfa yn ei wylio a band arian y dref yn chwarae.

Ym mis Awst 1932 cafodd un o'r tramiau ddamwain difrifol, gan ladd y gyrrwr a merch 12 mlwydd oed.

Torrodd bar llusgo'r tram ac fe redodd i lawr yr Hen Ffordd a tharo'r wal ar y gwaelod.

Wedi hyn bu'r dramffordd ar gau am weddill 1932 a'r flwyddyn ganlynol.

Gosodwyd brêcs argyfwng newydd ar y tramiau ac fe wnaeth y dramffordd ail-agor yn 1934.

Yn 2005 ail-agorwyd y dramffordd unwaith eto wedi pedair blynedd ar ôl gwario £4.5 miliwn yn ei hadfer.

Dywedodd Mr Jones byddai diwrnod o ddathlu ddydd Mawrth gyda chacen a chystadleuaeth i ymwelwyr ifanc.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.