Dyn wedi marw ar ôl disgyn yn Eryri

Glyder Fach (Llun: Stephen Walburn) Image copyright STEPHEN WALBURN
Image caption Roedd y ddau wedi bod yn cerdded ar Glyder Fach ger Dyffryn Ogwen

Mae dyn 23 oed o Dorset wedi marw wedi iddo ddisgyn 300 troedfedd ar fynydd Glyder Fach yn Eryri.

Roedd wedi bod yn cerdded gyda dyn arall mewn niwl isel pan ddigwyddodd y ddamwain ddydd Mawrth.

Dywedodd aelodau Tîm Achub Mynydd Dyffryn Ogwen ei bod hi'n ymddangos bod y ddau wedi dilyn llwybr anghywir ar hyd ochr ddwyreiniol y mynydd wrth geisio dod i lawr ond bod un wedi disgyn o ymyl clogwyn.

Ffoniodd dau ddringwr arall y gwasanaethau brys tua 5pm ddydd Mawrth.

Llwyddodd 28 aelod o'r tîm achub mynydd gyda chefnogaeth tîm achub a hofrennydd yr Awyrlu o'r Fali i gyrraedd y dringwyr a'r cerddwyr erbyn 6pm.

Aed â'r tri oedd yn holliach i ganolfan achub mynydd Dyffryn Ogwen ac fe gludwyd y dyn a ddisgynnodd i Ysbyty Gwynedd ym Mangor lle oedd cadarnhad ei fod wedi marw.

'Llithrig'

Dywedodd Chris Lloyd o Dîm Achub Mynydd Dyffryn Ogwen: "Roedd y ddau wedi bod yn cerdded ac yn chwilio am lwybr i lawr o gopa Glyder Fach.

Mi ddaethon nhw o hyd i un llwybr - yr un dwyreiniol ar y prif glogwyn - ond nid yw hwnnw'n llwybr da i ddod i lawr.

"Disgynnodd un ryw 300 o droedfeddi ac, yn anffodus, roedd yn gwymp angheuol.

"Roedd gan y ddau gyfarpar rhesymol ond roedd y niwl yn isel ac roedd yn llithrig dan draed.

"Yn anffodus, mae hwn yn un o'r digwyddiadau hynny sy'n gallu digwydd weithiau yn y mynyddoedd."

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.