Buddugoliaeth i Gasnewydd yn eu cartref newydd

Clwb Pêl-droed Casnewydd Image copyright Other

Casnewydd 4-0 Nuneaton

Ar ôl ennill oddi cartref yn eu gêm gyntaf y tymor yma o 4-3 fe wnaeth Casnewydd sicrhau eu bod yn parhau â'r rhediad a hynny yn eu cartref newydd.

Fe sicrhaodd Yr Alltudion fuddugoliaeth nos Fawrth yn Rodney Parade yn erbyn Nuneaton.

Rhwydodd y tîm cartref bedair gwaith.

Roedd hi'n 2-0 ar yr hanner wedi i Aaron O'Connor a Jefferson Louis ganfod cefn y rhwyd.

Cafodd O'Connor gôl arall yn yr ail hanner cyn i Lee Evans sgorio hefyd i selio'r fuddugoliaeth bedwar munud cyn y diwedd.

Wedi'r gêm dywedodd rheolwr Casnewydd, Justin Edinburgh, iddyn nhw gael "noson bleserus".

"Fe fyddai'n cofio'r noson yma am beth amser, ein gêm gystadleuol cyntaf yn ein cartref newydd a hynny o flaen cefnogwyr gwych," meddai.

"Roedd 'na bêl-droed gwych ar gae arbennig.

"Dwi'n meddwl bod pawb yn gwybod pam ein bod wedi dod i'n cartref newydd.

"Dwi'n credu bod pawb wedi gadael y stadiwm yn hapus iawn.

"Fe fyddwn ni'n mwynhau heno ac yna yn dod nôl at ein gilydd....y gêm nesa' yw ein hanoddaf eto."

Mae eu buddugoliaeth yn eu codi i frig tabl Uwchgynghrair Blue Square.

Fe fydd Casnewydd yn croesawu Lincoln City i Rodney Parade ddydd Sadwrn.

TABL UWCHGYNGHRAIR BLUE SQUARE
Gemau Gwahaniaeth Goliau Pwyntiau
1. CASNEWYDD 2 5 6
2. Stockport 2 2 6
3. Gateshead 2 3 4
4. Luton 2 2 4
5. Tamworth 2 1 4
12. WRECSAM 2 0 3

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.