Llai yn marw oherwydd cyffuriau

Cyffuriau a nodwydd
Image caption Yn 2011 bu farw 110 o ddynion a 27 o ferched oherwydd y camddefnydd o gyffuriau

Mae nifer y marwolaethau oherwydd y camddefnydd o gyffuriau yng Nghymru yn 2011 wedi gostwng yn ôl y Swyddfa Ystadegau Cenedlaethol.

Ond mae'r tueddiad cyffredinol wedi dangos cynnydd yn nifer y marwolaethau dros yr 20 mlynedd diwethaf.

Y llynedd fe wnaeth 137 o bobl farw o gymharu â 152 yn 2010.

Ond mae'r ffigyrau ar gyfer 1993 yn nodi 33 o farwolaethau ac 89 yn 2005.

Yng Nghymru mae'r nifer uchaf o farwolaethau o gymharu â phob rhanbarth yn Lloegr yn ôl yr ystadegau.

'Edrych yn bositif'

Dywedodd Ifor Williams, Prif Weithredwr Cynllun Cyffuriau Abertawe, bod y ffigyrau diweddara yn galonogol.

"Mae'n dangos bod addysg a chynlluniau cyffuriau yn gweithio.

"Dwi'n credu bod hi'n bwysig edrych ar y positif yn hytrach nag edrych ar yr 20 mlynedd diwethaf."

Dywedodd bod cefnogaeth Llywodraeth Cymru yn y blynyddoedd diweddar i'w ganmol, a bod defnyddwyr cyffuriau wedi medru cario'r gwrthwenwyn naloxone.

Mae hwnnw'n gweithio drwy atal effaith cyffur cysglyn fel heroin dros dro fel y gall wyrdroi effeithiau gorddos gan roi cyfle i'r defnyddiwr alw'r gwasanaethau brys am gymorth a thriniaeth.

"Rydym wedi bod yn annog atal gorddos gyda'n cleientau," medd Mr Williams.

"Does dim tystiolaeth i ddangos bod llai o bobl yn cymryd cyffuriau, ond maen nhw'n dangos bod addysg yn cael effaith."

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.