Scott Sinclair yn gadael Abertawe ond Sbaenwr yn ymuno â'r Elyrch

Scott Sinclair Image copyright Getty Images
Image caption Mae wedi sgorio 35 o goliau i Abertawe mewn 90 gêm

Mae Abertawe wedi cytuno ar ffi drosglwyddo fydd yn gweld Scott Sinclair yn gadael Stadiwm Liberty.

Bydd Sinclair yn symud i glwb Manchester City am £6.2 miliwn, ond mae'r Elyrch eisoes wedi symud i lenwi'r bwlch.

Deellir bod Abertawe wedi cytuno ar ffi i brynu'r asgellwr Pablo Hernendez o glwb Valencia yn Sbaen am £5.5 miliwn.

Roedd Abertawe wedi gwrthod un cynnig o £6.2 miliwn am Sinclair, ond mae'r cynnig newydd yn cynnwys cymalau allai weld y ffi yn codi i £8 miliwn gan ddibynnu ar ei berfformiadau.

Sgoriodd Sinclair 35 o goliau mewn 90 gêm i Abertawe.

Ond roedd eisoes wedi dweud na fyddai'n arwyddo cytundeb newydd pan fyddai ei gytundeb presennol yn dod i ben yn haf 2013.

Byddai hynny'n golygu y gallai adael y clwb heb i Abertawe dderbyn ceiniog amdano.

Image copyright Getty Images
Image caption Mae Pablo wedi chwarae pedair gwaith i Sbaen gan sgorio unwaith

Newydd-ddyfodiad

Mae Pablo, fel y mae'n cael ei adnabod, wedi sgorio 24 o goliau mewn 154 o gemau i Valencia, a hefyd wedi chwarae i glybiau Getafe a Cadiz yn Sbaen.

Fe sgoriodd mewn gêm yng Nghynghrair y Pencampwyr yn erbyn Manchester United yn Old Trafford ym mis Rhagfyr 2010.

Chwaraeodd yr asgellwr 27 oed bedair gêm i dîm rhyngwladol Sbaen, gan sgorio unwaith mewn buddugoliaeth o 5-1 yn erbyn Awstria.

Ef yw'r trydydd Sbaenwr i ymuno ag Abertawe dros yr haf, gan ddilyn Michu a Chico Flores i'r Liberty.

Mae'r tri wedi chwarae i'r rheolwr Michael Laudrup yn ystod ei gyfnod fel rheolwr yn Sbaen ym Mallorca a Getafe.

Straeon perthnasol