Raspberry Pi yn symud i Gymru o China

Raspberry Pi with SD memory card attached
Image caption Cyfrifiadur Raspberry Pi - sy'n ceisio ennyn diddordeb plant a phobl ifanc mewn rhaglennu cyfrifiaduron

Mae cwmni cyfrifiaduron poblogaidd Raspberry Pi yn symud y gwaith cynhyrchu o China o Gymru.

Cafodd y cyfrifiadur bach (maint cerdyn credyd) sy'n costio £16 ac sydd â'r nod o ennyn diddordeb pobl ifanc mewn rhaglennu cyfrifiaduron ei lansio'n gynharach eleni.

Mae llwyddiant y fenter wedi gweld cwmni Sony yn cynnig ei ffatri ym Mhencoed ger Pen-y-bont ar Ogwr i gynhyrchu'r cyfrifiadur bach.

Bydd y cytundeb yn golygu adeiladu 300,000 o'r byrddau cyfrifiadurol, gan greu 30 i swyddi ychwanegol ar y safle.

Bydd Sony'n adeiladu'r cyfrifiaduron ar ran cwmni Premier Farnell, sy'n dosbarthu'r Raspberry Pi i ddyfeiswyr y teclyn, Sefydliad Raspberry Pi.

Dywedodd cyfarwyddwr yr elusen, Eben Upton: "Mae'n ddiwrnod gwych i ni. Mae hyn wedi bod ar y gweill am tua chwe mis wedi i ni ymweld â safle Sony.

"Mae'n dda gwybod ein bod ni'n dal yn medru gwneud y math yma o beth yn y DU....ac yng Nghymru."

Cafodd y cyfrifiaduron Raspberry Pi cyntaf eu gwerth ym mis Chwefror, ond bu'n rhaid i'r sefydliad osod y gwaith cynhyrchu i China wedi iddyn nhw fethu dod o hyd i ffatri ym Mhrydain oedd yn fodlon gwneud y gwaith.

Ond mae llwyddiant ysgubol y teclyn wedi golygu gwerthiant sy'n ddigon uchel fel ei bod yn gost effeithlon i'w gynhyrchu yn y DU.

"Roedden ni wedi gobeithio gwerthu tua 10,000 yn y flwyddyn gyntaf - hyd yma mae'r gwerthiant yn 400,000. Mae pobl wrth eu bodd gyda'r teclyn," ychwanegodd Mr Upton.

Image copyright Sony
Image caption Mae'r Raspberry Pi newydd eisoes yn cael eu cynhyrchu ym Mhencoed

Dywedodd Steve Dalton, rheolwr Canolfan Dechnoleg Sony UK ym Mhencoed: "Rydym yma ym Mhencoed ers 20 mlynedd nawr, ac rydym wedi gorfod arallgyfeirio ein gwasanaeth er mwyn sicrhau cynaliadwyedd y ganolfan.

"Drwy weithio gyda chwmnïau dyfeisgar fel Premier Farnell, rydym wedi medru ymestyn ein gwasanaethau cynhyrchu.

"Hefyd mae Sefydliad Raspberry Pi yn rhannu ein gweledigaeth o ddatblygu gwybodaeth pobl ifanc am y diwydiant technoleg.

"Mae sefydliadau fel hyn yn cynorthwyo i greu technolegwyr y dyfodol drwy ysbrydoli'r genhedlaeth nesaf."

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.