Medal arian i Ellie Simmonds

Ellie
Image caption Ellie a'r Americanes ar ben eu digon ar ddiwedd y ras

Mae'r nofwraig Ellie Simmonds, sy'n hyfforddi yn Abertawe, wedi ennill medal arian yn y ras S6 dros 100 metr dull rhydd.

Roedd hi'n ail, 1 munud 14.82 o eiliadau, tu ôl yr Americanes, Victoria Arlen, 1 munud 13.33 o eiliadau, record byd newydd.

Yn rhagras y bore llwyddodd brenhines y pwll i sicrhau ei lle yn rownd derfynol fawr y nos.

"Fe wnes i fy ngorau yn ystod y 50 metr ola'," meddai Ellie.

"Byddai ennill yr aur wedi bod yn wych ond dyna fe, all neb gyflawni popeth.

"Dwi ddim am i'r gemau ddod i ben ... dwi'n edrych ymlaen at ddathlu gyda'r tîm."

Eisoes mae'r ferch 17 oed wedi ennill dwy fedal aur ac un efydd yn y gemau.

Cafodd ei geni yn Walsall, ei magu yn Abertawe cyn mynd i Ysgol Gyfun Olchfa.

Yn 2008 enillodd ddwy fedal aur yn y Gemau Paralympaidd yn China pan oedd hi'n 13 oed.

Straeon perthnasol