Gwasg Gomer ac undeb Unite yn dod i gyfaddawd

Gwasg Gomer
Image caption Honnodd yr undeb fod yna "ddiwylliant o fwlio" yn y gwaith

Dywed Gwasg Gomer eu bod wedi datrys yr anghydfod diwydiannol gydag aelodau o undeb Unite.

Roedd y gweithwyr wedi cynnal tair streic mewn anghydfod oedd yn ymwneud â chyflogau a honiadau o "ddiwylliant o fwlio" yn y gwaith.

Cafodd hynny ei wadu gan y cwmni.

Dywedodd llefarydd ar ran Gwasg Gomer fod y ddwy ochr wedi dod i gytundeb ddydd Gwener.

Yn ôl y llefarydd mae'r cwmni wedi cytuno "i hwyluso'r Gwasanaeth Cynghori, Cymodi a Dyfarnu (ACAS) i gynnal ymchwiliad cyn gynted ag y bo modd i'r cyhuddiadau, sydd heb eu profi eto, o fwlio a harasio yng ngwasg Gomer."

Mae'r cwmni hefyd wedi cytuno i dalu'r oriau a gollwyd yn sgil y gweithredu "pan fydd yr oriau hynny wedi'u gweithio nôl dros y 12 mis nesaf."

Deellir bod bron chwarter staff Gwasg Gomer yn aelodau o Unite.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.