Ymchwiliad i 'gamymddwyn' ym Mhrifysgol Caerdydd

Prifysgol Caerdydd
Image caption Mae ymchwiliad ffurfiol yn cael ei gynnal i waith y labordy

Mae ymchwiliad yn cael ei gynnal i waith labordy Deon Meddygaeth ym Mhrifysgol Caerdydd.

Daw hyn wedi honiadau o gamymddwyn ac mae'r brifysgol yn dweud bod y deon, yr Athro Paul Morgan, yn parhau yn ei swydd.

Mae'r honiadau, sy'n ymwneud â nifer o bapurau gafodd eu cynhyrchu gan dîm ymchwil o dan arweiniad yr athro, yn cynnwys manipiwleiddio delweddau.

Eisoes mae panel craffu wedi penderfynu bod 'na "ddigon o sail yn yr honiadau i gynnal ymchwiliad ffurfiol".

'Canllawiau'

Roedd y panel hefyd wedi casglu "bod rhai awduron wedi cydnabod cyfrifoldeb personol am rai agweddau ar honiadau unigol mewn perthynas ag erthyglau penodol ..."

Dywedodd llefarydd ar ran Prifysgol Caerdydd: "Mae'r broses yn dilyn canllawiau Swyddfa Cywirdeb Ymchwil Ffurfiol.

"Mae angen aros am ganlyniad yr ymchwiliad cyn gwneud sylw pellach."

Mae'r Athro Morgan yn bennaeth tîm ymchwil sydd, yn ôl gwefan y brifysgol, yn cael ei "gydnabod yn rhyngwladol am eu harbenigedd a'u cyfraniad i faes bywydeg ategol".

Ers 1998 mae wedi cyhoeddi 172 o bapurau a 35 o erthyglau adolygu.

Y llynedd cafodd papur yr un tîm ymchwil ei dynnu'n ôl o gylchgrawn ar ôl ymchwiliad.

Unigolyn

Ar y pryd dywedodd llefarydd ar ran y brifysgol fod 'na ymchwiliad mewnol llawn wedi ei gynnal a bod unigolyn wedi manipiwleiddio data.

"Yr unigolyn yn unig gyflawnodd hyn doedd yr un awdur arall ar y papur yn ymwybodol o'r manipiwleiddio.

"Daeth yr ymchwiliad i'r casgliad nad oedd 'na fwriad i gamarwain ...

"Er hynny, fe benderfynwyd tynnu'r papur yn ôl a dydi'r unigolyn bellach ddim yn y brifysgol."

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.