Codi gwaharddiad Mike Phillips

Mike Phillips Image copyright AFP
Image caption Roedd ymddygiad Mike Phillips wedi cythruddo llywydd clwb Bayonne, Alain Affelou

Mae clwb rygbi Bayonne wedi codi gwaharddiad ar fewnwr Cymru, Mike Phillips, ac fe fydd ar gael i chwarae yng Nghwpan Amlin wythnos i ddydd Gwener.

Roedd y clwb wedi gwahardd Phillips am gyfnod amhenodol yn dilyn ei ymddygiad oddi ar y cae.

Credir bod llywydd y clwb, Alain Affelou, wedi gwylltio bod Phillips wedi bod allan yn hwyr wedi i'r clwb golli gartref yn erbyn Toulouse.

Er mai dim ond ddydd Gwener y cyhoeddwyd y gwaharddiad, cadarnhaodd llefarydd ar ran y clwb, Nicolas Bridoux, ddydd Llun bod y gwaharddiad wedi ei godi ac y byddai Phillips yn cwrdd â Mr Affelou yr wythnos nesaf i drafod ei ymddygiad.

Nid oedd Phillips ar gael ar gyfer y fuddugoliaeth yn erbyn Biarritz dros y penwythnos ac ni fydd ar gael gyfer y gêm yn erbyn Agen y penwythnos nesaf oherwydd anaf i'w fys.

Dim effaith

Cyn i'r gwaharddiad gael ei godi, roedd cyn-gapten Cymru, Gwyn Jones, wedi dweud wrth BBC Cymru nad oedd yn credu y byddai'r gwaharddiad yn dylanwadu ar chwarae yn y tîm cenedlaethol.

"Rwy'n credu bod Warren yn meddwl y byd ohono," meddai.

"Mae Mike yn cael ei hun i drafferthion o bryd i'w gilydd, ac fe fydd yn cael ei ddisgyblu'n briodol, ond dydw i ddim yn credu y bydd hynny'n cael effaith ar farn Warren ohono.

"Os bydd popeth arall yn iawn a'i fod yn chwarae'n dda, fe fydd yn syth yn ôl yng ngharfan Cymru. Mae hyn wedi digwydd o'r blaen."

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.