Cofio Alan Turing mewn gŵyl ddigidol

Castell Conwy Image copyright Blinc
Image caption Bydd gŵyl Blinc yn dathlu bywyd Alan Turing eleni

Bydd y mathemategwr Alan Turing yn cael ei gofio yn ystod gŵyl o gelfyddyd ddigidol yng Nghonwy eleni.

Mae'r digwyddiad yn rhan o raglen o ddathliadau can mlynedd ers i Turing - oedd yn arloeswr ym maes cyfrifiaduron yn ogystal â'i gyfraniad enwog i ddatrys codau'r Almaenwyr yn ystod yr Ail Ryfel Byd - gael ei eni.

Dywedodd Joel Cockrill, un o guraduron yr ŵyl, na allai digwyddiad digidol o'r fath fod wedi bodoli heb waith Turing.

"Dydy pobl ddim yn sylweddoli mor ddylanwadol ydoedd," meddai.

"Fe helpodd ei waith mathemategol i dorri côd yr Enigma yn ystod yr Ail Ryfel Byd ac arweiniodd ei waith at ddatblygiad cyfrifiaduron modern.

Image copyright Science photo library
Image caption Roedd Alan Turing yn ymweld â gogledd Cymru'n aml

"Dywedodd Barack Obama ei bod mor ddylanwadol â Newton a Darwin," ychwanegodd.

Cafodd Alan Turing ei eni yn Llundain a bu farw yn Sir Gaer yn 1954 ond dywedodd Mr Cockrill bod ganddo gysylltiadau â gogledd Cymru.

"Roedd ganddo ffrindiau oedd yn byw ar ystâd Portmeirion ac roedd yn treulio llawer o amser yno," meddai.

Bydd yr ŵyl, Blinc, yn cael ei chynnal mewn wyth gwahanol leoliad yn nhref Conwy gan ddefnyddio waliau adeiladau megis y castell i ddangos gweithiau digidol.

Bydd gwaith nifer o artistiaid, gan gynnwys y Cymro Bedwyr Williams, i'w weld yn ystod yr ŵyl.

Dywedodd Mr Cockrill bod dathlu gwaith Alan Turing yn ystod yr ŵyl yn ffordd o ddiolch i'r mathemategwr.

"Does erioed wedi bod unrhyw ddigwyddiad swyddogol sydd yn diolch i Alan Turing am ei waith," meddai.

"Dyna pam rydyn ni'n ei gynnwys fel rhan o Blinc eleni."

Bydd gŵyl Blinc yn digwydd o 7 - 10pm ar 26 - 28 Hydref.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.