Artist o Mecsico yn ennill Gwobr Artes Mundii 2012

Teresa Margolles
Image caption Dywedodd y beirniaid fod gwaith Teresa Margolles "yn bwerus ac yn soffistigedig"

Yr artist Teresa Margolles o Fecsico sydd wedi ennill gwobr Artes Mundi eleni.

Cyhoeddwyd yr enillydd, sydd wedi ennill £40,000 mewn seremoni gafodd ei gynnal yn Amgueddfa Genedlaethol Caerdydd nos Iau.

Mae gwaith y saith artist oedd ar y rhestr fer, gan gynnwys Ms Margolles yn cael eu harddangos yn yr amgueddfa tan Ionawr 13 2013 fel rhan o'r gystadleuaeth.

Mae dros 30,000 o bobl eisoes wedi ymweld â'r arddangosfa yn ôl trefnwyr y gystadleuaeth.

Troseddau

Artistiaid o Cuba, India, Lithuania, Mecsico, Slofenia, Sweden a Llundain a gyrhaeddodd restr fer gystadleuaeth gelf gyfoes fwyaf y DU.

Dywedodd cadeirydd y panel o feirniaid, y darlledwr a churadur Tim Marlow, fod gwaith Teresa Margolles "yn bwerus ac yn soffistigedig".

Image copyright Other
Image caption "In the Air," darn o waith Teresa Margolles

Mae ei gwaith yn canolbwyntio ar brofiad cymdeithasol Gogledd Mecsico lle mae llawer o bobl wedi eu llofruddio o ganlyniad i droseddau sy'n ymwneud â chyffuriau.

Hon yw'r bumed flwyddyn i Artes Mundi gael ei chynnal - a gweithred a pherfformiad oedd yn cysylltu'r artistiaid eleni.

Bydd pob un o'r artistiaid eraill ar y rhestr fer yn cael gwobr newydd o £4,000 yr un.

Oherwydd partneriaeth newydd gydag oriel Mostyn yn Llandudno bydd un o'r artistiaid artist ar y rhestr fer yn cyflwyno sioe unigol yno yn 2013.

Y saith artist ar y rhestr fer oedd Miriam Bäckström (Sweden); Tania Bruguera (Cuba); Phil Collins (Lloegr); Sheela Gowda (India); Teresa Margolles (Mecsico); Darius Mikšys (Lithuania) ac Apolonija Šušteršič (Slofenia).

Roedd dros 750 o enwebiadau, gan gynnwys 576 o artistiaid unigol o dros 90 o wledydd.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.