Goleuo'r gamlas ar ddiwedd blwyddyn o ddathlu

Clo ar Gamlas Mynwy ac Aberhonddu Image copyright Other
Image caption Mae 'na 200 mlynedd ers i'r gamlas agor

Bydd cymunedau ar hyd camlas Mynwy ac Aberhonddu yn 'Goleuo'r gamlas' gyda llusernau a cherfluniau tân ar ddydd Sadwrn.

Mae'r digwyddiad yn dod â blwyddyn o ddathliadau i nodi 200 mlynedd ers agor y gamlas i ben.

Bydd cloch yr eglwys ger Basin Pont-y-Moel yn canu i ddechau'r digwyddiad yn y bore a bydd yn cael ei ddilyn gan glychau'r eglwysi eraill ar hyd y gamlas.

Bydd yr eglwys olaf yn canu ei chloch am 6pm ac ar yr un amser bydd gorymdaith o lusernau yn cychwyn tuag at fasin y gamlas.

Bydd y llusernau'n cael eu rhoi ar wyneb y dŵr er mwyn goleuo'r gamlas a bydd cerfluniau tân, perfformwyr stryd a cherddoriaeth i ddiddanu ymwelwyr.

Meddai Carol Williams, Swyddog Prosiect ar gyfer Parc Cenedlaethol Bannau Brycheiniog:

"Mae dathliadau i nodi daucanmlwyddiant Camlas Mynwy ac Aberhonddu wedi cael eu cynnal drwy gydol y flwyddyn, ond rydym yn sicr wedi cadw'r gorau tan y diwedd gyda 'Goleuo'r gamlas'.

"Bydd y digwyddiad yn deyrnged wirioneddol addas i dirnod hanesyddol sydd wedi bod yn rhan mor bwysig o fywyd yma yn y Bannau Brycheiniog a thu hwnt am gymaint o flynyddoedd."

Mae nifer o ddigwyddiadau wedi cael eu cynnal yn ystod y flwyddyn gan gynnwys ail greu'r agoriad cyntaf yn 1812 ym Masin Pont-y-Moel.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.