Rhyddhau cefnogwr Clwb Pêl-droed Abertawe ar fechnïaeth

  • 9 Rhagfyr 2012
Bassong
Sebastien Bassong (ar y dde) sgoriodd yr ail gôl

Mae cefnogwr Clwb Pêl-droed Abertawe, gafodd ei arestio ar amheuaeth o ymddwyn yn hiliol tuag at un o chwaraewyr Norwich, wedi cael ei ryddhau ar fechnïaeth.

Cafodd y dyn 23 oed ei arestio yn Stadiwm y Liberty ddydd Sadwrn ar ôl cwyn amddiffynwr Norwich, Sebastien Bassong.

Collodd Abertawe 4-3 ac roedd y drosedd honedig wedi i Robert Snodgrass sgorio'r bedwaredd gôl.

Cwynodd Bassong wrth y dyfarnwr Howard Webb gyfeiriodd y mater i swyddog cyn i'r cefnogwr gael ei arestio.

'10 munud'

Dywedodd llefarydd ar ran Clwb Pêl-droed Abertawe: "O fewn 10 munud roedd stiwardiaid yn gwylio'r lluniau teledu ac yn adnabod y troseddwr honedig ...

"Yr heddlu sy'n delio â hyn. O safbwynt y clwb mae hiliaeth yn ffiaidd ac rydyn ni ers blynyddoedd wedi ceisio sicrhau bod hwn yn glwb ar gyfer y teulu."

Dywedodd rheolwr Norwich, Chris Hughton: "Dwi wedi siarad â Seb ac mae Abertawe wedi delio â hyn yn gywir."

Mae rheolwr Abertawe, Michael Laudrup, wedi dweud: "Ar y pryd roeddwn i'n canolbwyntio ar y gêm.

"Doeddwn i ddim yn gwybod am y drosedd honedig ond does dim angen hyn yn y gêm, ddim yn unman."