Undeb Rygbi Cymru yn ystyried cae artiffisial ar gyfer Stadiwm y Mileniwm

Cae Stadiwm y Mileniwm Image copyright Huw Evans picture agency
Image caption Mae 'na sawl beirniadaeth wedi bod am gyflwr y cae

Mae Undeb Rygbi Cymru yn ystyried gosod cae artiffisial yn Stadiwm y Mileniwm.

Ar hyn o bryd mae'r cae yn cael ei dyfu yn rhywle arall cyn cael ei symud a'i osod yn y stadiwm.

Mae'r stadiwm yn gobeithio cynnal chwech o gemau Cwpan Rygbi'r Byd yn 2015.

Mae'r undeb yn credu bod y defnydd artiffisial yn ddewis amgenach i laswellt.

"Rydym yn rhoi ystyriaeth wirioneddol o'r holl opsiynau," meddai Roger Lewis, Prif Weithredwr yr Undeb.

Nid oes modd chwarae darnau sain a fideo ar eich dyfais
Adroddiad Iwan Griffiths

Ers i'r stadiwm agor yn 1999 mae 'na broblemau wedi bod gyda'r wyneb.

Bu'n rhaid cael cae newydd yn 2009 oherwydd pryfed a achosodd ddifrod i'r tyfiant.

Nid chwaraewyr rygbi yn unig sydd wedi cwyno.

Cymeradwyaeth

Roedd y pêl-droedwyr Aaron Ramsey ac Ashley Williams yn feirniadol ar ôl i Gymru golli yn erbyn Lloegr yn 2011 yng ngemau rhagbrofol Ewrop 2012..

Mae'r Bwrdd Rygbi Rhyngwladol a FIFA eisoes wedi cymeradwyo defnyddio cae artiffisial.

Wrth siarad gyda BBC Cymru dywedodd Mr Lewis bod sawl cynnig wedi bod o dan y chwyddwydr.

Un oedd maes rhannol artiffisial a glaswellt naturiol fel sy'n cael ei ddefnyddio yn Stadiwm Liberty.

Ond bellach maen nhw'n ystyried cwbl artiffisial.

Fe fydd yr undeb yn asesu'r cynllun yn y flwyddyn newydd pan fydd y Saraseniaid yn wynebu'r Gleision yng Nghwpan LV ar Ionawr 27.

Dyma fydd y gêm rygbi proffesiynol gyntaf i'w chwarae ar gae artiffisial.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.