Cynllun caer Rufeinig yn Sir y Fflint gam yn nes

Dynion wedi eu gwisgo fel milwyr Rhufeinig Image copyright bbc
Image caption Bydd caer a phentref Rhufeinig yn cael eu creu fel rhan o'r cynlluniau

Dywed dyn o Sir y Fflint ei fod gam yn nes at wireddu ei freuddwyd o addasu hen chwarel yn gaer Rufeinig.

Mae Paul Harston o Gaergwrle wedi sicrhau £200,000 er mwyn diogelu'r tir yn Yr Hôb ar y ffin rhwng Wrecsam a Sir y Fflint.

Mae Mr Harston yn gobeithio cael caniatâd cynllunio yn fuan.

Mae o eisoes yn cynnal atyniad twristiaeth llwyddiannus yng Nghaer, Teithiau Rhufeinig.

Gwireddu'r freuddwyd

Ond mae'n freuddwyd plentyndod iddo greu cymuned Rufeinig.

Cwmni Hanson sy'n berchen ar y safle sy'n cael ei werthu i'r fenter gymdeithasol.

Mae Mr Harston eisoes wedi cael £50,000 mewn gwobr gan Fanc Barclays wedi cystadleuaeth ar gyfer busnesau bach.

Dywedodd y byddai'r atyniad yn "creu byd o'r Ganrif Gyntaf ar gyfer plant ac oedolion".

"Y gobaith yw gallu cymryd drosodd y safle erbyn mis Chwefror neu Fawrth ac yna fe allwn ni wneud cais cynllunio i newid defnydd y safle.

"Y disgwyl yw y byddwn ni'n cychwyn datblygu'r safle o fis Medi ymlaen."

Dywedodd bod 'na dipyn o waith i'w wneud, gan gynnwys clirio'r safle a'i gael yn fwy addas i'r Ganrif Gyntaf, gan gynnwys plannu'r planhigion oedd yn bodoli yng nghyfnod y Rhufeiniaid.

"Mae'n bwysig bod y gymuned leol yn gefn i ni er mwyn gwireddu'r freuddwyd," ychwanegodd.

Am 60 mlynedd bu cloddio am fwynau yn yr hen chwarel sydd ar y safle 90 acer.

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.