Cwmni awyren yn diswyddo 300

Awyren FlyBe
Mae 13 o safleoedd gan Flybe ym Mhrydain gan gynnwys un yng Nghaerdydd

Mae cwmni awyrennau Flybe wedi cyhoeddi y byddan nhw'n cael gwared ar 300 o swyddi, rhyw 0% o'r gweithlu.

Dywedodd y cwmni eu bod yn ceisio arbed £35m ar ôl colledion sylweddol y llynedd.

Mae 13 o safleoedd gan Flybe ym Mhrydain, gan gynnwys un yng Nghaerdydd.

Daw'r cyhoeddiad fis ar ôl i Lywodraeth Cymru gyhoeddi eu bod am brynu Maes Awyr Caerdydd.

Yn y flwyddyn hyd at Hydref y llynedd dim ond miliwn o deithwyr gafodd eu cofnodi ym Maes Awyr Caerdydd.

Gallai'r nifer ar gyfer 2012 fod yn waeth nag ar unrhyw adeg ers 1997.

Cytundeb

Disgwylir i'r llywodraeth brynu'r maes awyr yn ystod y misoedd nesaf wedi iddyn nhw daro cytundeb â'r perchnogion, TBI.

Dywedodd arweinydd y Ceidwadwyr yn y Cynulliad, Andrew R T Davies, ei fod wedi cyflwyno cwestiwn ar frys i'r Gweinidog Busnes Edwina Hart yn sgil cyhoeddiad Flybe ond ei fod wedi ei synnu am fod Llywydd y Cynulliad Rosemary Butler wedi ei wrthod.

"Mae cyhoeddiad y cwmni awyrennau diwethaf sy'n darparu gwasanaeth cost isel yn y maes awyr yn achosi pryder," meddai Mr Davies.

"Rhaid i Lywodraeth Cymru fod yn uchelgeisiol a helpu'r maes awyr i hyrwyddo potensial y safle.

"Ond os bydd y llywodraeth yn llaesu dwylo ac yn methu â helpu'r cwmnïau awyrennau efallai y bydd Flybe, fel nifer o gwmnïau tebyg yn ystod y blynyddoedd diwethaf, yn penderfynu adleoli."

Mae BBC Cymru wedi gofyn i Lywodraeth Cymru am eu hymateb.