Dau blentyn ar goll yng Nghymru?

Sophie a Jack Fletcher Image copyright West Midlands Police
Image caption Sophie Fletcher a'i brawd Jack

Mae'r heddlu sy'n chwilio am ddau blentyn ar goll yn credu efallai eu bod wedi teithio ar drên i Geredigion.

Ar hyn o bryd mae Heddlu Gorllewin Canolbarth Lloegr yn apelio am wybodaeth am leoliad Sophie Fletcher, 12 oed, a'i brawd Jack Fletcher, 10 oed.

Y gred yw bod y ddau wedi gadael eu cartref yn Darlaston, Walsall, fore Mercher.

Dywedodd yr heddlu fod y ddau efallai wedi teithio i'r Borth yng Ngogledd Ceredigion.

Craith

Mae'r ddau wedi bod ar eu gwyliau yn y pentref glan môr o'r blaen, yn ôl yr heddlu.

Dywedodd yr heddlu fod Sophie'n bum troedfedd a dwy fodfedd o ran taldra gyda gwallt brown a llygaid glas.

Y gred yw ei bod hi'n gwisgo cot gyda phrint llewpard arni a throwsus porffor.

Mae Jack yn bum troedfedd o daldra gyda gwallt melyn syth a chraith hanner modfedd o led ar ei dalcen.

Credir ei fod yn gwisgo cot Benzini gyda llythrennau melyn llachar arni, sgidiau du a chap gyda'r llythrennau 'NY' arno.

Dywedodd yr Arolygydd Stuart Vaughan: "Nid yw'r plant wedi bod ar goll o'r blaen ac er eu bod wedi mynd ag arian a dillad rydym yn pryderu amdanyn nhw, yn enwedig am fod y tywydd mor oer."

Dylai unrhywun â gwybodaeth gysylltu â'r Heddlu ar 101.

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.