Howley: 'Peidiwch rhoi pwysau ar Biggar'

Dan Biggar Image copyright Huw Evans picture agency
Image caption Dechreuodd gyrfa ryngwladol Biggar yn 2008 yn erbyn Canada

Mae hyfforddwr dro dro tîm rygbi Cymru wedi ymbil ar y wasg a'r cyfryngau i beidio rhoi gormod o bwysau ar y maswr Dan Biggar.

Biggar gafodd ei ddewis gan Rob Howley i ddechrau'r gêm agoriadol ym Mhencampwriaeth y Chwe Gwlad yn erbyn Iwerddon ddydd Sadwrn o flaen James Hook.

Dywedodd Howley: "Mae'n bwysig ei fod yn cael cyfle ac, os gwelwch yn dda, allwch chi gadw'r pwysau oddi arno fe."

Roedd Howley'n cydnabod bod angen i Biggar ateb rhai cwestiynau.

'Agos iawn'

Mae Biggar, 23 oed, yn cymryd lle Rhys Priestland sydd ag anaf i'w dennyn Achilles i ennill ei 12fed cap o Gymru mewn gyrfa a ddechreuodd yn 2008 yn erbyn Canada.

Ers hynny nid yw'r chwaraewr 6'2", 14st 8 pwys, wedi chwarae rhan mewn unrhyw gêm yn y Chwe Gwlad wrth i yrfa Stephen Jones barhau, ac yna Priestland yn ennill ei le.

Cyn i'r anaf ddod â'i obeithion yn y bencampwriaeth i ben, roedd cymaint o feirniadaeth o Priestland fel iddo fynd i ofyn am gymorth proffesiynnol.

Dywedodd Howley bod y penderfyniad rhwng Biggar a Hook yn un "agos iawn".

Ychwanegodd bod gemau da i'r Gweilch yn erbyn Toulouse a Chaerlŷr yng Nghwpan Heineken wedi bod yn allweddol.

"Rydym wedi gweld beth sy'n digwydd i bob rhif 10 yng Nghymru (dod o dan bwysau), ac mae'n bwysig iddo gael y cyfle i ddatblygu.

'Aeddfedu'

"Mae'n gêm fawr i Dan - mae'n deall hynny'n amlwg. Mae'n deall hefyd bod cystadleuaeth am y crys gan James.

"Ond mae Dan wedi aeddfedu dros y 12 mis diwethaf, ac rydym wedi bod yn onest gydag e yn nhermau rheoli ei gêm, ei fygythiad wrth redeg a'i gicio.

"Wrth siarad gyda phobl fel Neil Jenkins, fe gafodd Hooky, Steve Jones a Rhys Priestland amser i wella.

"Rwy'n credu ei bod yn bwysig i Dan ganolbwyntio ar hwyluso gwaith y tîm a chael y gorau gan y chwaraewyr o'i gwmpas, ac rwy'n sicr y bydd Dan yn gwneud hynny."

Y cefnwr Leigh Halfpenny fydd yn gyfrifol am gicio at y pyst, ac mae Howley'n credu y bydd hynny'n caniatáu i Biggar ganolbwyntio ar ei rôl dactegol.

CYMRU v.IWERDDON: Stadiwm y Mileniwm, Caerdydd; Dydd Sadwrn, Chwefror 2 am 1:30pm:

CYMRU: Leigh Halfpenny (Gleision); Alex Cuthbert (Gleision), Jonathan Davies (Scarlets), Jamie Roberts (Gleision), George North (Scarlets); Dan Biggar (Gweilch), Mike Phillips (Bayonne); Gethin Jenkins (Toulon), Matthew Rees (Scarlets), Adam Jones (Gweilch), Andrew Coombs (Dreigiau), Ian Evans (Gweilch), Aaron Shingler (Scarlets), Sam Warburton (Gleision, capten), Toby Faletau (Dreigiau).

EILYDDION: Ken Owens (Scarlets), Paul James (Caerfaddon), Craig Mitchell (Caerwysg), Olly Kohn (Harlequins), Justin Tipuric (Gweilch), Lloyd Williams (Gleision), James Hook (Perpignan), Scott Williams (Scarlets).

IWERDDON: R Kearney; C Gilroy, B O'Driscoll, G D'Arcy, S Zebo; J Sexton, C Murray; C Healy, R Best, M Ross; M McCarthy, D Ryan; P O'Mahony, S O'Brien, J Heaslip (capten).

EILYDDION: S Cronin, D Kilcoyne, D Fitzpatrick, C Henry, D O'Callaghan, E Reddan, R O'Gara, K Earls.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.