Swyddi ceir yn diflannu

  • 7 Chwefror 2013
Ceir ar werth
Bydd gwaith cynhyrchu ar y safle ym Mochdre yn dod i ben

Fe fydd 79 o'r 83 o bobl sy'n cael eu cyflogi mewn ffatri cydrannau ceir yn sir Conwy yn colli eu gwaith.

Ddydd Mercher clywodd staff yn ffatri Quinton Hazell, ym Mochdre ger Bae Colwyn fod y cwmni wedi ei roi yn nwylo'r gweinyddwyr KPMG.

Roedd undeb Unite wedi gobeithio y byddai'r cwmni yn cael ei werthu a'r ffatri yn parhau i gynhyrchu.

Ond dywedodd y gweinyddwyr KPMG y byddai'r gwaith cynhyrchu ar y safle'n dod i ben.

Dywedodd AS Gorllewin Clwyd, David Jones, ei fod yn poeni am y cyhoeddiad.

'Trafferthion'

"Mae'r ffatri wedi cael trafferthion yn y gorffennol ond mi oeddwn i'n gobeithio y byddai'r sefyllfa ariannol yn sefydlog."

Dywedodd ei fod wedi ysgrifennu at y gweinyddwyr.

"Bydd pedwar gweithiwr yn parhau ar y safle er mwyn helpu dirwyn y gwaith i ben.

Cafodd 120 o weithwyr eu diswyddo yn 2007 gan y cwmni gafodd ei sefydlu gan y diweddar Eric Quinton Hazell ar ôl yr Ail Ryfel Byd.

Bryd hynny cafodd gwaith cynhyrchu cydwyr ei symud i Sir Warwick, gyda staff ym Mochdre yn cynhyrchu pympiau dŵr.