Siop HMV i gau yn Wrecsam

Siop HMV
Roedd gwerthiant Nadolig yn siomedig gan arwain at broblemau

Mae siop HMV yn Wrecsam ymysg 66 o ganghennau'r cwmni fydd yn cau dros y ddeufis nesaf.

Daw'r cyhoeddiad wedi i'r cwmni fynd i ddwylo'r gweinyddwyr ym mis Ionawr eleni.

Gallai bron i fil o bobl golli eu gwaith o gau'r siopau hynny.

Mae siop HMV yn Wrecsam yn cyflogi 11 o bobl.

Cystadleuaeth

Mae gan y cwmni chwe siop arall yng Nghymru, yn Llandudno, Bangor, Abertawe, Caerdydd, Casnewydd a Chwmbrân.

Bydd y busnes, sy'n gwerthu cerddoriaeth ar gryno ddisgiau a fideos ymysg nwyddau eraill, yn parhau i weithredu tra bydd y gweinyddwyr, Deloitte, yn chwilio am brynwr newydd.

Mae 'na 239 o ganghennau ym Mhrydain ac Iwerddon.

Cychwynnodd y cwmni yn 1921 ac maen nhw wedi wynebu cystadleuaeth yn sgil prynu nwyddau ar y we.

Agorwyd y siop gyntaf yn Oxford Street yn Llundain.

Oherwydd problemau yn gynharach fe wnaeth y cwmni werthu rhannau o'r busnes, gan gynnwys siopau llyfrau Waterstones.