Rheilffordd: 'Plant yn peryglu eu bywydau' yn Sir Gâr

  • 13 Chwefror 2013
Trenau Arriva
Mae problemau wedi bod ym Mhensarn, Caerfyrddin

Mae plant yn peryglu eu bywydau wrth groesi cledrau rheilffordd i fynd i fwyty bwyd brys yn Sir Gâr, yn ôl yr Heddlu Trafnidiaeth.

Dywedodd yr heddlu eu bod wedi derbyn adroddiadau fod plant mewn gwisg ysgol yn croesi'r rheilffordd ym Mhensarn, Caerfyrddin, a'i defnyddio fel llwybr brys

Maen nhw hefyd wedi cael adroddiadau fod pobl yn cerdded eu cŵn ar y cledrau ger gorsaf Llangennech.

Dywedodd yr heddlu y gallai'r "digwyddiadau arwain at ganlyniadau arswydus".

Yn ôl y Cwnstabl Dai Maynard yng Nghaerfyrddin: "Fy mhryder i yw nad yw'r bobl hyn yn hollol ymwybodol o'r perygl y maen nhw'n ei wynebu.

"Mae'r rhain yn ddigwyddiadau pryderus iawn ac rwy'n ofni y gallai rhywun gael ei niweidio'n ddifrifol neu gael ei ladd os na fydd y digwyddiadau hyn yn dod i ben."

Dywedodd yr heddlu mai eu prif nod yw diogelu'r cyhoedd ond y gallai unrhywun sy'n tresmasu ar y cledrau gael hysbysiad cosb o £50.