Tata: Colled o £50m mewn tri mis

Mae cwmni dur Tata, sy'n cyflogi rhyw 7,500 o bobl yng Nghymru, wedi dweud bod gostyngiad sylweddol yn eu helw yn Ewrop.

Yn ôl ffigyrau ar gyfer tri mis diwethaf 2012, roedd colledion o £50m tra oedd colledion o £5m yn ystod y tri mis cynt.

Ond mae'r golled yn llai na'r golled o £91m yn ystod tri mis olaf 2011.

Mae'r cwmni'n gobeithio y bydd eu perfformiad yn gwella ar ôl dechrau defnyddio'u ffwrnais newydd ym Mhort Talbot ddydd Mawrth.

'Llai o alw'

Roedd y prosiect i ailadeiladu un o'r ddwy ffwrnais ar y safle wedi costio £185 miliwn.

Dywedodd y cwmni mai "llai o alw" oedd y broblem allweddol yn wynebu cwmnïau dur Ewrop yn 2012.

Dywedodd prif weithredwr Tata yn Ewrop, Karl Kohler: "Rydym wedi adfer ein hyblygrwydd wrth ailagor Ffwrnais Rhif 4 ym Mhort Talbot yr wythnos hon.

"Bydd hyn yn ein galluogi i wella ein perfformiad a gwella ein gwasanaeth ar gyfer ein cwsmeriaid."

Bydd yr haearn tawdd o'r ffwrnais yn cael ei droi'n ddur ar gyfer y diwydiannau adeiladu, ceir, codi a chloddio, offer domestig a phecynnu.

Mae'r safle ym Mhort Talbot yng nghanol y cyfnod mwyaf o ddiswyddiadau ers mwy na 20 mlynedd.

Fis Tachwedd cyhoeddodd Tata y byddai mwy na 500 o swyddi yng Nghymru yn cael eu colli, y rhan fwyaf ym Mhort Talbot.