Y chwilio am Ben Thompson yn parhau

  • 18 Chwefror 2013
Ben Thompson
Ben Thompson yn croesi Heol Lecwydd, Caerdydd, am 7:17pm nos Sadwrn, Chwefror 2, 2013

Mae timau arbenigol yn parhau i chwilio am ddyn 34 oed o Hwlffordd a ddiflannodd ar ôl mynd i weld gêm Cymru yn erbyn Iwerddon yn Stadiwm y Mileniwm ar Chwefror 2.

Bydd offer arbenigol yn cael ei ddefnyddio i chwilio aber afon Elái unwaith eto.

Roedd Mr Thompson wedi teithio i Gaerdydd gyda'i ffrind wedi iddo ennill tocynnau ar gyfer gêm gyntaf Cymru ym mhencampwriaeth y Chwe Gwlad.

Fe ffoniodd ei wraig Jo wedi'r gêm i ddweud wrthi ei fod yn mynd i'w hoff dafarn yn y ddinas.

Fe'i gwelwyd gan ffrindiau am y tro olaf yn Lôn y Felin tua 6.30pm.

Mae lluniau teledu cylch cyfyng yn ei ddangos yn croesi Heol Lecwydd i gyfeiriad Lawrenny Avenue am 7.17pm.

Mae'r lluniau yn ei ddangos funudau wedyn yn cerdded i lawr lôn ar waelod y ffordd honno.

Dywed yr heddlu nad oes neb wedi gweld Mr Thompson ers hynny ac nad yw ei ffôn symudol wedi cael ei ddefnyddio chwaith.

Ddydd Iau a dydd Gwener ddiwethaf bu timau arbenigol yn canolbwyntio ar afon Elái rhwng pont Bryn Lecwydd a'r aber ger Clwb Hwylio Bae Caerdydd.

Cefnogaeth

Aeth Mr Thompson i'r gêm yn Stadiwm y Mileniwm ar Chwefror 2

Dywedodd yr heddlu eu bod mewn cysylltiad cyson gyda theulu Mr Thompson.

"Maen nhw'n naturiol yn bryderus," meddai llefarydd.

"Mae swyddog arbenigol yr heddlu gyda nhw."

Mae Mr Thompson yn 5 troedfedd 9 modfedd o daldra, gyda gwallt byr brown a llygaid glas.

Roedd yn gwisgo bŵts brown, jîns glas a chrys gwyn gyda streipen las denau.

Os oes gan unrhyw un wybodaeth, dylid cysylltu gyda'r heddlu yng Ngorsaf Bae Caerdydd ar 02920 338 465.